काठमाडौं – वातावरण, संस्कृति, र पर्यटन प्रवर्द्धनमा उत्कृष्ट कार्य सम्पादन गरेको उच्च मूल्यांकन गर्दै नेपाल नगरपालिका संघले मध्यपुर थिमि नगरपालिकालाई “मुलुककै उत्कृष्ट नगरपालिका पुरस्कार २०८१” द्वारा सम्मानित गरेको छ।
नेपाल नगरपालिका सङ्घको ३२ औँ वार्षिकोत्सवको अवसरमा आयोजित विशेष समारोहमा प्रधानमन्त्री केपी शर्मा ओलीको प्रमुख आतिथ्यमा नगरपालिकालाई सम्मानपत्र प्रदान गरिएको हो।
नेपाल नगरपालिका संघले प्रत्येक वर्ष उत्कृष्ट कार्य सम्पादन गर्ने नगरपालिकालाई सम्मान गर्ने परम्परा कायम राख्दै आएको छ। यस वर्ष मध्यपुर थिमि नगरपालिकाले वातावरण संरक्षण, संस्कृति प्रवर्द्धन, र पर्यटन विकासका क्षेत्रमा उल्लेखनीय योगदान पुर्याएको भन्दै मुलुककै उत्कृष्ट नगरपालिका घोषणा गरिएको हो।
मध्यपुर थिमि नगरपालिकाका नगर प्रमुख सुरेन्द्र श्रेष्ठले यो सम्मानलाई आगामी दिनमा अझ उत्कृष्ट कार्य गर्ने प्रेरणाको स्रोतका रूपमा लिएको प्रतिक्रिया दिए।