काठमाडौं – मोबाइललाई आजको युगमा समाजको अनिवार्य उपभोग्य वस्तुका रूपमा लिइन्छ। यसको आपूर्ति तथा वितरणमा संलग्न व्यवसायीहरूको छाता संस्था नेपाल मोबाइल वितरक संघको तेस्रो महाधिवेशनले रघु त्रिपाठीलाई अध्यक्षमा निर्विरोध निर्वाचित गरेको छ।
नगरकोटस्थित रत्नागिरी होटलमा सम्पन्न महाधिवेशनले १५ सदस्यीय नयाँ कार्यसमिति सर्वसम्मत रूपमा चयन गरेको हो। समितिमा वरिष्ठ उपाध्यक्ष हरि केसी, उपाध्यक्ष राम नारायण दास, महासचिव बाल नरसिंह कुँवर, सचिव नवीन बाँस्तोला, कोषाध्यक्ष रामचन्द्र श्रेष्ठ र सह-कोषाध्यक्ष विनोद केसी चयन भएका छन्।
अन्य निर्वाचित सदस्यहरूमा दिपेन्द्र चौलागाईं, विजय चौधरी, निकित अग्रवाल, श्रीशान्त थापा, दीपक कोइराला, चित्र बस्नेत र निशान्त कुमार अग्रवाल छन्।
कार्यभार ग्रहण गर्दै अध्यक्ष त्रिपाठीले व्यवसायको अनियमितता, अव्यवस्था र अवैध कारोबार अन्त्य गर्न व्यवसायीहरूलाई एकीकृत रूपमा अघि बढ्न आह्वान गरे। उनले मोबाइल फोन आयातकर्ता संघ र मोबाइल व्यवसायी महासंघसँग सहकार्य गर्दै न्यायोचित व्यापारिक वातावरण र लगानीको सुरक्षा सुनिश्चित गर्ने प्रतिबद्धता व्यक्त गरे।
संघका सचिव नवीन बाँस्तोलाले आगामी बैशाख २६ गते काठमाडौंमा पदस्थापन, स्मारिका विमोचन तथा पूर्व कार्यसमितिलाई बिदाइ कार्यक्रम हुने जानकारी दिए। त्रिपाठी नेतृत्वको नयाँ टिमले व्यवसायीहरूको हकहित र स्थायित्वमा थप सशक्त भूमिका खेल्ने अपेक्षा गरिएको छ।
