बन्दीपुर (तनहुँ) – राष्ट्रिय फोटो पत्रकार समूह कास्की शाखाले प्रकाशन गरेको २०८२ सालको क्यालेण्डर विमोचन गरिएको छ। शनिबार तनहुँको प्रमुख पर्यटकीय गन्तव्य बन्दीपुरमा आयोजना गरिएको ‘बन्दीपुरको पर्यटन प्रवर्द्धनमा फोटो पत्रकारको भूमिका’ विषयक अन्तरक्रिया कार्यक्रममा शाखाले स्थानीय संस्कृति, प्राकृतिक सौन्दर्य र सामाजिक जीवनशैली झल्किने तस्बिरहरू समावेश गरी क्यालेण्डर तयार गरेको हो।
कार्यक्रमका प्रमुख अतिथि तथा बन्दीपुर गाउँपालिकाका अध्यक्ष सुरेन्द्रबहादुर थापाले क्यालेण्डर विमोचन गर्दै फोटो पत्रकारहरूले समाजको दृश्य अभिलेख राख्ने महत्वपूर्ण काम गरिरहेको बताए। उनले कास्की शाखाको यो प्रयासले पोखराको प्रवर्द्धनमा योगदान पुर्याउने विश्वास व्यक्त गरे।
राष्ट्रिय फोटो पत्रकार समूह कास्की शाखाका अध्यक्ष योगेन्द्र श्रेष्ठले क्यालेण्डरमा समेटिएका तस्बिरहरू सदस्यहरूद्वारा विभिन्न समयमा खिचिएका मौलिक दृश्यहरू भएको जानकारी दिए। उनले फोटो पत्रकारिताको माध्यमबाट स्थानीय संस्कृति र सौन्दर्यलाई प्रचारप्रसार गर्ने उद्देश्यले क्यालेण्डर प्रकाशन गरिएको बताए।
कार्यक्रममा विभिन्न सञ्चार संस्थाका फोटो पत्रकारहरू, होटल तथा पर्यटन व्यवसायी तथा नागरिक समाजका प्रतिनिधिहरूको उपस्थिति थियो।
