राहुल गुप्ता – बारा, परवानीपुर – बारा जिल्लाको परवानीपुर गाउँपालिका वडा नं. ५ नौतन निवासी नेपाली काँग्रेसका वरिष्ठ नेता योगेन्द्र प्रसाद साहको ७२ वर्षको उमेरमा आज बिहान ८:३० बजे निधन भएको छ। स्व. साह नेपाली काँग्रेसका पूर्व उपप्रधान पञ्च, पूर्व इकाई सभापति तथा क्षेत्रीय प्रतिनिधिका रूपमा लामो समयदेखि पार्टीमा सक्रिय रहनुभएको थियो।
उहाँको निधनले पार्टीले एक अनुभवी अभिभावक, समर्पित नेता तथा समाजसेवक गुमाएको काँग्रेसले जनाएको छ। पार्टीले श्रद्धासहित राष्ट्रिय झण्डा ओढाएर उहाँलाई सम्मानपूर्वक अन्तिम विदाई गरेको हो।
शोकको यस घडीमा नेपाली काँग्रेस बारा जिल्ला सभापति राजेश राय यादव, क्षेत्र नं. ४ का सभापति सुनिल गुप्ता, क्षेत्र नं. ४(ख) का सभापति लोकेश सिंह, केन्द्रीय महाधिवेशन प्रतिनिधि जगदीश साह कानु, नेपाल तरुण दलका केन्द्रीय सदस्य राजकिशोर गुप्ता, जिल्ला सदस्य रबि साह, पूर्व इकाई सभापति मोहनलाल दास,वडा अध्यक्ष रामेश्वर साह कलवार, समाजसेवी राजन दास लगायतको उपस्थिति रहेको थियो।
नेपाली काँग्रेसले दिवंगत आत्माको चिरशान्तिको कामना गर्दै शोकसन्तप्त परिवारजनप्रति गहिरो समवेदना प्रकट गरेको छ।
