बेइजिङ, चीन – उर्जा, जलस्रोत तथा सिँचाई मन्त्री दीपक खड्काले नेपालमा लगानीको वातावरण बन्दै गएको बताउँदै चीनमा रहेका नेपाली समुदायलाई उर्जा लगायतका क्षेत्रमा ढुक्क भएर लगानी गर्न आग्रह गर्नुभएको छ।
चीन भ्रमणमा रहनुभएका मन्त्री खड्काले बेइजिङमा आयोजित ट्रेड फेस्टको अवलोकन गर्दै सम्बोधनका क्रममा नेपालको समृद्धिको आधार जलस्रोत हुने स्पष्ट पार्दै, सरकारले सन् २०३५ सम्म २८,५০০ मेगावाट जलविद्युत उत्पादन गर्ने लक्ष्य लिएको जानकारी दिनुभयो। उहाँले त्यसमध्ये १५,००० मेगावाट विजुली भारतसहित तेस्रो मुलुकमा निर्यात गरिने लक्ष्य रहेको पनि बताउनुभयो।
“जो जहाँ भएपनि नेपालीलाई माया नेपालकै हुन्छ। त्यसैले सकेको लगानी र सहयोग देशमै गर्नुहोस्,” मन्त्री खड्काले भन्नुभयो, “सरकारले लगानीमैत्री वातावरण बनाइसकेको छ, अब हामी सबै मिलेर देशको विकासमा लाग्नुपर्छ।”
उहाँले आफू मन्त्री बनेपछि सार्वजनिक गरिएको ऊर्जा विकास मार्गचित्र–२०८१ मार्फत ऊर्जा क्षेत्रमा स्पष्ट दिशा तय गरिएको बताउँदै संसदमा छलफलरत जलस्रोत तथा विद्युत विधेयक छिट्टै पारित गरेर नीतिगत अस्पष्टता अन्त्य गरिने बताउनुभयो। मन्त्री खड्काले नेपालले बंगलादेशलाई हाल ४० मेगावाट विद्युत बिक्री गरिरहेको र भविष्यमा ५,००० मेगावाटसम्म आपूर्ति गर्ने समझदारीमा पुगिसकेको जानकारी समेत दिनुभयो।
भेटमा सहभागी नेपाली प्रतिनिधिहरुले ऊर्जा क्षेत्रमा मन्त्री खड्काको स्पष्ट नीति र सक्रियताप्रति सन्तोष व्यक्त गर्दै, लगानीका लागि आफूहरू तयार रहेको तर लगानी सुरक्षा सुनिश्चित गर्नुपर्ने माग गरेका थिए।
