काठमाडौं — दोस्रो संस्करणको एभरेष्ट महिला भलिबल लिग (EWVL) का लागि टोली मधेश युनाइटेड ले राष्ट्रिय महिला भलिबल टोलीकी प्रमुख स्पाइकर निरुता ठगुन्नालाई पुनः मार्की खेलाडीको रूपमा अनुबन्ध गरेको छ।
गत संस्करणमा उत्कृष्ट प्रदर्शन गर्दै टोलीको नेतृत्व गरेकी ठगुन्नाले फेरि पनि मधेश युनाइटेडसँग खेल्ने अवसर पाउँदा खुशी व्यक्त गरेकी छन्।
“टिमलाई विजेता बनाउन म आफ्नो उत्कृष्ट प्रदर्शन दिनेछु,” उनले भनिन्। क्लबले ठगुन्नाको पुनरागमनलाई स्वागत गर्दै भनेको छ, “पहिलो संस्करणमा बलियो प्रदर्शन गर्दै टोलीको नेतृत्व गरेकी निरुता फेरि फर्किँदा हामीलाई गर्व लागेको छ। उनी यसपटक पनि कोर्टमा आफ्नो प्रभुत्व देखाउनेछिन् भन्ने हामीलाई विश्वास छ।”
यसअघि मधेश युनाइटेडले कोपिला उप्रेतीलाई प्रशिक्षकका रूपमा नियुक्त गरिसकेको छ। ईन्फिनिटी ड्रिम्सको आयोजनामा हुने दोस्रो एभरेष्ट महिला भलिबल लिग आगामी भदौ २० देखि २८ गतेसम्म काठमाडौंमा आयोजना हुनेछ।
