काठमाडौं – नेपाली कांग्रेसका सांसद एवं पूर्व ऊर्जा, जलस्रोत तथा सिंचाई राज्यमन्त्री पूर्णबहादुर तामाङ ‘कान्छाराम’को निर्माण कम्पनी कान्छाराम कन्स्ट्रक्सनलाई कर्णाली प्रदेश सरकारले कालोसूचीमा राखेको छ।
प्रदेशको भौतिक पूर्वाधार तथा शहरी विकास मन्त्रालयअन्तर्गतको पूर्वाधार विकास निर्देशनालय, सुर्खेतले वीरेन्द्रनगर योजना क्षेत्रभित्रको सडक स्तरोन्नति (प्याकेज–१) कार्य समयमा सम्पन्न नगरेको र सम्झौता तोडेको भन्दै यस्तो कारबाही अघि बढाएको हो।
निर्देशनालयका अनुसार २०७८ भदौ १७ मा भएको सम्झौतालाई कम्पनीले बीचमै छोडेको, म्याद पटक–पटक थपिए पनि काम नगरेको, स्रोतसाधन नपठाएको र बैठक तथा पत्राचारमा समेत सहभागी नभएको उल्लेख छ।
निर्देशनालयका निमित्त निर्देशक ई. सूर्यबहादुर शाहीद्वारा पठाइएको पत्रमा, सार्वजनिक खरिद नियमावली २०६३ को नियम १४१ र ठेक्का सम्झौताअन्तर्गतका प्रावधानहरूअनुसार कम्पनीलाई कालोसूचीमा राख्ने सिफारिस गरिएको उल्लेख छ।
२०७९ मंसिर २० भित्र सकिनुपर्ने काम अहिलेसम्म पूरा नभएको र कम्पनीले काम नगर्ने संकेत देखिएपछि ठेक्का तोड्ने प्रक्रिया समेत अगाडि बढाइएको निर्देशनालयले जनाएको छ।
कम्पनीको नाम सांसद तामाङसँग जोडिए पनि उनले यसअघि आफू संलग्न नरहेको दाबी गरेका थिए। तर निर्देशनालयका पत्रहरूमा कम्पनीको ठेगाना र इमेलसहितका विवरण तामाङसँग प्रत्यक्षरूपमा जोडिएका पाइएको छ।
