काठमाडौं – काठमाडौंको दक्षिण भेग दक्षिणकाली नगरपालिकामा पर्ने यो मन्दिर उपत्यकाको प्रमुख शक्तिपीठ मध्ये एक मानिन्छ ।
जगतजननी श्री दक्षिणकाली माईको मन्दिरमा शनिबार वार्षिक महापूजा सम्पन्न भएको छ। परम्पराअनुसार प्रत्येक वर्ष दुई पटक – वैशाख कृष्ण त्रयोदशी र भाद्र कृष्ण अष्टमीका दिन – महापूजा आयोजना गरिन्छ। सोही परम्परा अनुसार आज बिहानैदेखि मन्दिर परिसरमा विशेष पूजापाठ, हवन तथा बलिप्रदान गरिएको थियो।
महापूजामा ठूलो संख्यामा भक्तजनहरूको उपस्थिती रहेको थियो। सहभागी भक्तहरूले दक्षिणकाली माईको दर्शन गरी परिवारको सुख, शान्ति, स्वास्थ्य र समृद्धिको लागि प्रार्थना गरेका थिए। पूजामा संलग्न पुजारीहरूले वैदिक विधिअनुसार विशेष मन्त्र जापसहित पूजा सम्पन्न गरेका थिए।
तस्वीरहरु: सुजन श्रेष्ठ/अन्नपूर्ण टाइम्स
