काठमाडौं – दुई वर्षपछि घरेलु रंगशालामा फर्किएको नेपाली राष्ट्रिय फुटबल टोलीले अन्तर्राष्ट्रिय फुटबलमा जितसहितको पुनरागमन गर्न सकेन। शनिबार त्रिपुरेश्वरस्थित दशरथ रंगशालामा भएको मैत्रीपूर्ण खेलमा नेपाल र बंगलादेश गोलरहित बराबरीमा रोकिए।
खेलको पहिलो हाफमा दुवै टोलीले आक्रमणका केही अवसर सिर्जना गरे पनि गोल निकाल्न सकेनन्। १० औं मिनेटमा कप्तान जमाल भुयाँको कर्नरमा राकिब होसेनले हेडमार्फत गोलको प्रयास गर्दा नेपाली गोलकिपर किरण चेम्जोङले उत्कृष्ट बचाउ गरे। केही समयपछि मणि लामाको फ्रिकिकमा अनन्त तामाङको हेड पनि बंगलादेशी गोलकिपर मोहम्मद सुजोन होसेनले रोके।
३९ औं मिनेटमा बंगलादेशका सुमोन रेजाको प्रहार क्रसबारमाथि गयो भने दोस्रो हाफमा दुवै टोलीले गोल गर्ने स्पष्ट अवसर पाए। ६८ औं मिनेटमा नेपालका जिलेश्पीजंग कार्कीको शक्तिशाली प्रहार सुजोनले रोके भने ७८ औं मिनेटमा मोहम्मद ताज उदीनको प्रहार किरणले कठिनाईका साथ रोक्न सफल भए।
नेपाल र बंगलादेशबीचको दोस्रो मैत्रीपूर्ण खेल मंगलबार दशरथ रंगशालामै हुनेछ। दोस्रो खेलमा पनि बराबरी भए विजेता पेनाल्टी सुटआउटमार्फत टुङ्गो लाग्नेछ।
