काठमाडौं — राष्ट्रिय सेवा दलले देशभरका २२१ विद्यालयमा अध्ययनरत ६ हजार ६३० छात्रछात्रालाई समेट्दै जुनियर डिभिजन राष्ट्रिय सेवा दल (एनसीसी) तालिम सुरु गरेको छ।
सोमबारदेखि शुभारम्भ भएको उक्त तालिम दुई चरणमा सञ्चालन गरिने राष्ट्रिय सेवा दलले जनाएको छ। पहिलो चरणअन्तर्गत विद्यालयमै संस्थागत तालिम सञ्चालन हुनेछ भने दोस्रो चरणमा वार्षिक सामूहिक क्याम्प आयोजना गरिनेछ।
राष्ट्रिय सेवा दलका अनुसार आगामी भदौ महिनादेखि ३६ विद्यालयका १ हजार ८० विद्यार्थीलाई समेटेर सिनियर डिभिजन तालिम सञ्चालन गर्ने योजना पनि रहेको छ।
तालिममा सैनिक कला, विपद् जोखिम न्यूनीकरण, नेतृत्व तथा व्यक्तित्व विकास, सामाजिक उत्तरदायित्व, अनुशासनलगायत विषयमा सैद्धान्तिक तथा व्यवहारिक ज्ञान प्रदान गरिनेछ। यसबाट विद्यार्थीमा नेतृत्व क्षमता, अनुशासन तथा राष्ट्रप्रतिको जिम्मेवारीबोध विकास हुने अपेक्षा गरिएको छ।
वि.सं. २०२२ सालमा स्थापना भएको राष्ट्रिय सेवा दलले स्थापनाकालदेखि हालसम्म ८९ हजार ८९४ जनालाई जुनियर तथा सिनियर डिभिजन तालिम प्रदान गरिसकेको छ। तालिम प्राप्त व्यक्तिहरू केन्द्र, प्रदेश तथा जिल्ला तहसम्मका एलुम्नाइ एसोसिएसनमा आबद्ध भई विभिन्न सामाजिक तथा राष्ट्रिय गतिविधिमा सक्रिय रूपमा सहभागी हुँदै आएका छन्।
राष्ट्रिय सेवा दलले युवापुस्तामा अनुशासन, नेतृत्व, सेवा भावना तथा राष्ट्रप्रेमको विकास गर्दै सक्षम नागरिक उत्पादनमा महत्वपूर्ण योगदान पुर्याउँदै आएको जनाएको छ।
