काठमाडौं – नेपाली फुटबलका लागि गौरवको विषय बनेको एक महत्वपूर्ण उपलब्धिमा नेपाली महिला रेफ्री लक्ष्मी श्रेष्ठ विश्वकै प्रतिष्ठित युवा फुटबल प्रतियोगिता डाना कप (DANA Cup) मा खेल सञ्चालन (सुपरभाइज) का लागि पुनः मनोनित हुनुभएको छ।
डेनमार्कमा आगामी जुलाई २० देखि सुरु हुने प्रतियोगितामा लक्ष्मी श्रेष्ठले अन्तर्राष्ट्रिय स्तरका खेलहरू सञ्चालन गर्दै आफ्नो रेफ्री कौशल प्रदर्शन गर्नुहुनेछ।
लक्ष्मीका लागि डाना कपको यो पहिलो सहभागिता भने होइन। उहाँ सन् २०२२ देखि लगातार यस प्रतिष्ठित प्रतियोगितामा रेफ्रीका रूपमा मनोनित हुँदै खेल सञ्चालन गर्दै आउनुभएको छ। विश्वभरका हजारौँ युवा खेलाडी तथा खेल अधिकारी सहभागी हुने यति ठूलो अन्तर्राष्ट्रिय मञ्चमा निरन्तर अवसर पाउनु उहाँको व्यावसायिक दक्षता, निष्पक्ष निर्णय क्षमता र खेलप्रतिको अनुशासनको अन्तर्राष्ट्रिय मान्यता मानिएको छ।
विश्व फुटबलमा डाना कपलाई युवा खेलाडीहरूको ‘मिनी वर्ल्ड कप’ का रूपमा समेत चिनिन्छ। सन् १९८२ देखि डेनमार्कमा हरेक वर्ष आयोजना हुँदै आएको यस प्रतियोगितामा विश्वका ४५ भन्दा बढी देशका १,००० भन्दा बढी टोली सहभागी हुने गरेका छन्। यस्तो प्रतिष्ठित प्रतियोगितामा नेपाली महिला रेफ्रीले निरन्तर खेल सञ्चालन गर्ने अवसर पाउनु नेपाली फुटबलका लागि ऐतिहासिक उपलब्धिका रूपमा हेरिएको छ।
लक्ष्मी श्रेष्ठको सफलताले नेपालमा रेफ्री बन्न चाहने तथा खेलकुद क्षेत्रमा भविष्य निर्माण गर्न चाहने विशेषगरी महिला खेलकर्मीहरूलाई प्रेरणा मिल्ने विश्वास गरिएको छ। निरन्तर मेहनत, क्षमता र अवसर पाए नेपाली रेफ्रीहरू पनि विश्वस्तरीय प्रतियोगितामा उत्कृष्ट भूमिका निर्वाह गर्न सक्षम छन् भन्ने सन्देश उहाँको उपलब्धिले दिएको छ।
