यमपञ्चक अर्थात् तिहारको दोस्रो दिन आज देशभर कुकुर तिहार मनाइएको छ। यस अवसरमा नेपाली सेनाले तालिमप्राप्त कुकुरहरूको विशेष सीप तथा कलाकौशल प्रदर्शन गरेर कुकुर तिहार मनाएको छ। भक्तपुरको सानोठिमीस्थित नेपाली सेनाको भैरव वाहन गुल्ममा आयोजित कार्यक्रममा तालिमप्राप्त कुकुरहरूले विभिन्न सीप प्रदर्शन गरेका हुन्।
प्रदर्शनका क्रममा कुकुरहरूले अनुशासन पालना, सुरक्षा जाँच, विपद्का बेला उद्धार तथा विभिन्न वस्तु र व्यक्तिको खोजी (ट्र्याकिङ) लगायतका सीप देखाएका थिए। कुकुरहरूले देखाएको कौशलले सुरक्षा तथा उद्धार कार्यमा उनीहरूको महत्त्वपूर्ण भूमिका उजागर गरेको थियो।
कार्यक्रममा प्रदर्शनपछि तालिमप्राप्त कुकुरहरूलाई टीका र माला लगाएर कुकुर पूजा गरिएको थियो। साथै उनीहरूलाई मिठा खानेकुरा खुवाएर कुकुर तिहार मनाइएको थियो।
हिन्दू धार्मिक तथा सांस्कृतिक परम्पराअनुसार यमपञ्चकको पहिलो दिन काग तिहार र दोस्रो दिन कुकुर तिहार मनाइन्छ। कुकुरलाई यमराजको दूत तथा मानिसको बफादार साथीका रूपमा सम्मान गर्दै यस दिन पूजा गर्ने परम्परा छ।
कुकुरको बफादारी, सुरक्षा र मानव जीवनमा पुर्याउँदै आएको योगदानको सम्मानस्वरूप तिहारमा कुकुरको पूजा गर्ने गरिन्छ।
