काठमाडौं – नेकपा एमालेनिकट राष्ट्रिय युवा संघ नेपालका धादिङ जिल्ला इञ्चार्ज दीपक खतिवडा समातिएका छन् । गजुरी गाउँपालिका, किरान्चोकका स्थानीय नानीराम पराजुलीमाथि कुटपिटको अभियोगमा बिहीबार प्रहरीले उनलाई समातेको हो।
एमाले पृष्ठभूमिका पराजुली केही समयअघि मात्रै दल बदलेर कांग्रेस प्रवेश गरेका थिए । उनी हाल गजुरी गाउँपालिका, कांग्रेस कमिटीको सह–सचिव छन् ।
पार्टी परिवर्तनपछि निरन्तर धम्की दिइँदै आएकोमा अहिले त्यसैको रिस फेर्न कुटपिट गरिएको पीडितको आरोप छ । खतिवडाविरुद्ध कुटपिटको उजुरी परेपछि छानबिनका लागि नियन्त्रणमा लिइएको जिल्ला प्रहरी कार्यालय, धादिङले जनाएको छ । उनलाई अहिले इलाका प्रहरी कार्यालय, गजुरीमा राखिएको छ । उनी रक्सीले मातेको अवस्थामा समातिएका हुन् ।
धादिङमा पछिल्लो समय कांग्रेस र एमालेबीच द्वन्द्व बढेको छ । बुधबार मात्रै एमालेका स्थानीय नेता राजेन्द्रविक्रम बस्नेतमाथि हातपात भएको थियो ।
एमाले गजुरी गाँउपालिका कमिटीका अध्यक्ष माधव भण्डारीद्धारा हस्ताक्षरित् विज्ञप्तिमा अध्यक्ष बस्नेतमाथीको हातपात सुनियोजित् भएको भन्दै दोषीमाथी कारवाहि गर्न समेत माग गरेको छ ।
उक्त घटनाप्रति प्रहरीले गोप्य रुपमा छानबिन गरीरहँदा बिहिबार दिँउसो एमाले युवा संघका जिल्ला इन्चार्जसमेत रहेका खतिवडालाई प्रहरीले पक्राउ गरेको हो ।
खतिवडाले गजुरी गाँउपालिका वडा नं. ७ स्थित् किरान्चोकका स्थानिय नानिराम पराजुलीमाथी कुटपिट गरेको उजुरीका आधारमा पक्राउ गरिएको प्रहरीले जनाएको छ । खतिवडालाई अहिले ईलाका प्रहरी कार्यालय गजुरीमा राखिएको प्रहरी श्रोतले जनाएको छ ।
