काठमाडौं — काठमाडौँ स्पोर्ट्स एन्ड एभेन्ट्स प्रा.लि.ले आयोजना गर्न लागेको कर्पोरेट टि–१० लिगका लागि नेपाली राष्ट्रिय महिला क्रिकेट खेलाडी खुशी डंगोललाई ‘फेस अफ कर्पोरेट टि–१०’ नियुक्त गरिएको छ।
आज आयोजित एक कार्यक्रममा उनलाई औपचारिक रूपमा उक्त जिम्मेवारी प्रदान गरिएको हो। सन् २०१७ देखि क्रिकेट यात्रा सुरु गरेकी डंगोलले अगस्ट २०२३ मा राष्ट्रिय टोलीबाट अन्तर्राष्ट्रिय डेब्यु गरेकी थिइन्। कुवेतविरुद्धको आफ्नो पहिलो खेलमै पहिलो बलमा विकेट लिँदै उनले ऐतिहासिक उपलब्धि हासिल गरेकी थिइन्।
डंगोलले २०१९ को प्रधानमन्त्री कपमा एक रन पनि नदिई ५ विकेट लिएर कीर्तिमान बनाएकी थिइन्। हालसम्म उनले १० अन्तर्राष्ट्रिय खेल खेलिसकेकी छन्।
कार्यक्रममा बोल्दै उनले ‘फेस’ बन्न पाउँदा खुशी व्यक्त गर्दै यस्तो प्लेटफर्मले महिला खेलाडीलाई थप अवसर दिने बताइन्। साथै, कर्पोरेट क्षेत्र र क्रिकेटबीचको सम्बन्ध मजबुत बनाउने विश्वास व्यक्त गरिन्।
काठमाडौँ स्पोर्ट्स एन्ड एभेन्ट्सका निर्देशक ज्योति भण्डारीले खुशीजस्तो प्रतिभाशाली खेलाडीको सहभागिताले लिगमा थप ऊर्जा र आकर्षण ल्याउने बताए।
कर्पोरेट टि–१० लिग वैशाख १० देखि १७ गतेसम्म काठमाडौंको तल्लो मुलपानी क्रिकेट मैदानमा सञ्चालन हुनेछ।
