पोखरा – राष्ट्रिय फोटो पत्रकार समूह (एनएफपीजे) नेपालको निमन्त्रणामा नेपाल भ्रमणमा आएका बंगलादेश फोटो पत्रकार संघका अध्यक्ष एकेएम मोहसिनको नेतृत्वमा रहेका १२ जना वरिष्ठ फोटो पत्रकारले पोखराको अन्नपूर्ण केबलकारमार्फत सराङकोटको भ्रमण गरेका छन्।
नेपाल भ्रमणका क्रममा पोखरा पुगेका बंगलादेशी फोटो पत्रकारलाई अन्नपूर्ण केबलकारका महाप्रबन्धक दिनेश पौड्यालले स्वागत गर्दै मायाको चिनो प्रदान गरेका थिए। पौड्यालले बंगलादेशी फोटो पत्रकारलाई स्वागत गर्न पाउँदा खुसी व्यक्त गर्दै आगामी दिनमा बंगलादेशबाट ठूलो संख्यामा पर्यटक पोखरा भित्र्याउन आफूहरू आतुर रहेको बताए।
उनले पछिल्लो समय बंगलादेशबाट नेपाल भ्रमणमा आउने पर्यटकको संख्या बढ्दै गएको उल्लेख गर्दै पोखराले समेत बंगलादेशी पर्यटकलाई आकर्षित गरिरहेकोमा खुसी व्यक्त गरे। बंगलादेशी फोटो पत्रकारहरूले आफ्ना सञ्चारमाध्यम, फोटो तथा सामाजिक सञ्जालमार्फत अन्नपूर्ण केबलकारसहित पोखराको पर्यटन प्रवद्र्धनमा महत्वपूर्ण योगदान पुर्याउन सक्ने उनको भनाइ थियो।
पौड्यालले पोखराको प्राकृतिक सौन्दर्य, हिमाली दृश्य, फेवाताल, संस्कृति तथा विभिन्न पर्यटकीय गतिविधिलाई विश्वसामु चिनाउन फोटो पत्रकारको भूमिका महत्वपूर्ण हुने बताए।
नेपाल र बंगलादेशका फोटो पत्रकारबीच व्यावसायिक सम्बन्ध विस्तार, अनुभव आदानप्रदान, सांस्कृतिक सम्बन्ध सुदृढीकरण तथा पर्यटन प्रवद्र्धन गर्ने उद्देश्यले एनएफपीजे नेपालको निमन्त्रणामा १२ सदस्यीय बंगलादेशी फोटो पत्रकारको टोली नेपाल भ्रमणमा आएको हो।
टोलीको नेपाल भ्रमणले दुई देशका फोटो पत्रकारबीचको सम्बन्ध थप विस्तार हुनुका साथै बंगलादेशमा नेपालका पर्यटकीय गन्तव्यको प्रचारप्रसार गरी बंगलादेशी पर्यटकलाई नेपाल भित्र्याउनसमेत सहयोग पुग्ने अपेक्षा गरिएको छ।
