डोल्पा – डोल्पाको सदरमुकाम दुनैस्थित जिल्ला कारागारबाट सुरुङ खनेर आठ जना कैदी फरार भएका छन्। शुक्रबार राति कारागारभित्र ४ मिटर ६३ सेन्टिमिटर लामो सुरुङ खनेर उनीहरू फरार भएका हुन्।
घटनाबारे जानकारी प्राप्त भएपछि जिल्ला प्रहरी कार्यालय डोल्पाका प्रहरी नायब उपरीक्षक (डीएसपी) अनिलराज गिरीसहितको प्रहरी टोली कारागार पुगेको थियो। डीएसपी गिरीका अनुसार कैदीहरूले कारागारभित्र सुरुङ खनेर भागेका हुन्।
फरार हुनेमा जबरजस्ती करणी मुद्दामा कैद भुक्तान गरिरहेका पाँच जना र चोरी मुद्दाका तीन जना रहेका छन्।
फरार हुनेहरूमा रुकुम पश्चिमको आठबिसकोट नगरपालिका–१० का राम विक, डोल्पाको त्रिपुरासुन्दरी नगरपालिका–७ का कालिप्रसाद रोकाया, त्रिपुरासुन्दरी नगरपालिका–४ का धनबहादुर बुढा भन्ने हरिबहादुर बुढा, सल्यानको कुमाख गाउँपालिका–५ का रेशम राना र जाजरकोटको बारेकोट गाउँपालिका–१ का यज्ञ विक छन्। उनीहरू जबरजस्ती करणी मुद्दाका कैदी हुन्।
त्यस्तै, चोरी मुद्दाका कैदी जाजरकोटको नलगाड नगरपालिका–९ का कैलाश भन्ने कपिल परियार तथा पुर्पक्षका लागि थुनामा रहेका रुकुम पश्चिमको आठबिसकोट नगरपालिका–५ का तिलक भण्डारी र वडा नम्बर ३ का आदेश भण्डारी पनि फरार भएका छन्।
घटनाको विस्तृत अनुसन्धान तथा स्थलगत निरीक्षणपछि मात्रै फरार भएको अवस्थालगायत थप विवरण यकिन हुने प्रहरीले जनाएको छ। फरार कैदीहरूको खोजी तथा घटनाबारे थप अनुसन्धान भइरहेको छ। तस्बिर: लेख बुढा/नेपाल फोटो सर्भिस (NPS)
