काठमाडौ – अर्थमन्त्री डा. युवराज खतिवडाले बुधबार संघीय संसदको संयुक्त वैठकमा आगामी आर्थिक वर्षको बजेट प्रस्तुत गरेका हुन् ।सरकारले आगामी आर्थिक वर्ष २०७६/७७ का लागि १५ खर्ब ३२ अर्ब ९६ करोड ७१ लाखकोे अनुमानित आय–व्ययको विवरण (बजेट) प्रस्तुत गरेको छ ।
सरकारले आगामी आर्थिक वर्षका लागि गरेको कूल विनियोजनमध्ये चालु (प्रशासनिक खर्च) तर्फ ९ खर्ब ५७ अर्ब १० करोड १४ लाख अर्थात् ६२ दशमलब ४ प्रतिशत छुट्याएको छ । यस्तै, पूँजीगत (विकास खर्च) तर्फ ४ खर्ब ८ अर्ब ५९ लाख अर्थात् २६ दशमलब ६ प्रतिशत बजेट छुट्याएको छ । सरकारले वित्तिय व्यवस्थातर्फ १ खर्ब ६७ अर्ब ८५ करोड ९८ लाख अर्थात् ११ प्रतिशत बजेट छुट्याएको छ ।
सरकारले आगामी आर्थिक वर्षको बजेटमा अनुमान गरिउको खर्च व्यहोर्न राजस्वबाट ९ खर्ब ८१ अर्ब १३ करोड ८३ लाख रुपैयाँ उठाउने लक्ष्य लिएको छ । यस्तै, बैदेशिक अनुदानबाट ५७ अर्ब ९९ करोड ५५ लाख रुपैयाँ जुटाउने सरकारी लक्ष्य छ ।
कूल विनियोजनमा अपुग हुने ४ खर्ब ९३ अर्ब ८३ करोड ३३ लाख रुपैयाँमध्ये २ खर्ब ९८ अर्ब ८३ करोड ३३ लाख रुपैयाँ वैदेशिक ऋणबाट र १ खर्ब ९५ अर्ब रुपैयाँ आन्तरिक ऋणबाट उठाइने बजेटमा उल्लेख छ ।
आगामी आर्थिक बर्षको बजेट चालु आर्थिक वर्षको बजेटभन्दा २ खर्ब १७ अर्ब ८० करोडले बढी छ । चालु आर्थिक वर्ष २०७५/७६ का लागि १३ खर्ब १५ अर्ब १६ करोड १७ लाख रुपैयाँको बजेट विनियोजन गरिएको थियो ।
