काठमाडौं – काठमाडौं महानगरपालिकाले खुलामञ्चमा श्रमिक, गरीब र असहायले खाना खाँदा आफ्नो बेइज्जत भएको जनाएको छ । महानगरले उक्त उनीहरुलाई खाना खुवाउने अभियानमा रोक पनि लगाएको छ ।
विभिन्न मनकारी व्यक्ति तथा संस्थाले कोरोना भाइरस (कोभिड १९) तथा लकडाउन प्रभावित श्रमिक, गरीब र असहायलाई निःशुल्क खाना खुवाउँदै आएका थिए । सडकमै खाना खुवाउँदा आफ्नो बेइज्जत भएको भन्दै महानगरपालिकाका मेयर विद्यासुन्दर शाक्यले यसमा रोक लगाएका हुन् ।
महानगरपालिकाले नगर प्रहरी पठाएर तीन दिनदेखि खाना वितरणमा रोक लगाएपछि कोरोना र लकडाउनका कारण भोकै पर्दै आएका श्रमिक, गरीब र असहायहरुको विचल्ली भएको छ ।
महानगरपालिकाले सोमबार पनि नगर प्रहरी पठाएर खाना खुवाउन अवरोध गरेको छ । नगर प्रहरीको टोलीले ‘मेयरसापको आदेश’ भन्दै खाना वितरणमा रोक लगाएको खाना खुवाउने अभियानमा लागेकाहरुले बताएका छन् ।
