रामेछाप । रामेछाप जिल्ला सदरमुकाम मन्थलीको खानेपानी वितरण प्रणालीलाई थप व्यवस्थित र भरपर्दो वनाउनका लागि अभियानको रुपमा काम हुने भएको छ ।मन्थली नगरपालिकाका प्रमुख रमेशकुमार बस्नेतको अग्रसरतामा बुधबार मन्थलीमा भएको एक कार्यक्रममा मन्थलीमा हाल वितरित खानेपानी प्रणालीमा व्यापक सुधारको आवश्यक भएको र थप पूर्वाधारको काम गर्नुपर्ने निष्कर्षसहित तत्काल कार्य योजना बनाएर काम अघि बढाउने निर्णय भएको हो ।
पॉच बर्ष अघि सुरु भएको मन्थली खानेपानी सुधार विस्तार योजनामा आवश्यक पूर्वाधारको जोहो हुँदा समेत उक्त योजनाबाट पानी संचालन नभएकोमा सहभागिले आक्रोश पोखेका थिए । उक्त योजनाको ईन्टेक, पाईपलाईन, ट्यांकी र विद्युतिय सामाग्रीको जोहो भइसक्दा पनि संघीय खानेपानी तथा ढल व्यवस्थापन आयोजनाले पानी संचालन गर्न तदारुकता नदेखाएको सहभागिहरुको गुनासो थियो ।
छलफलका क्रममा नयां इन्टेकबाट पानी तानेरमा निर्माण गरेर खाली राखेका २ वटा ट्यांकीमा पानी जम्मा गर्ने र थप लाईन विस्तारको काम संघीय खानेपानी तथा ढल निकाश आयोजनाले तत्काल थाल्ने निर्णय भएको छ । आयोजनाका प्रमुख जगन्नाथ पूर्वेले तत्काल उपभोक्ता समितिसंग सहकार्य गरी उक्त कार्य थाल्ने प्रतिवद्धता बैठकमा गरेका थिए ।
यसैगरी हाल वितरण गरीएका खानेपानीका लाईनमा चुहावट उच्च भएकोले त्यसको सुधार गर्ने, सडकको दाया बाँया लाईन विस्तार गर्ने र छुट भएका क्षेत्रमा समेत पानीको वितरण पु¥याउनका लागि साविकमा भएको सर्बे डिजाईनमा पुनारावलोकन गर्ने समेत निर्णय भएको छ । उक्त कार्य आयोजनाले दोश्रो चरणमा गर्नेछ ।
मन्थली नगरपालिका प्रमुख रमेशकुमार वस्नेतले खानेपानी वितरणका लागि समस्या भइरहेका बेला योजनाका २ वटा टंकी रित्ता रहनु दुर्भाग्य भएको भन्दै अरु काम छोडेर पनि उक्त ट्यांकी सम्म पानी लगेर वितरण गर्नुपर्नेमा जोडदिए । ‘वत्ति नभएको दिन पानीको हाहाकार हुने अवस्था छ ’ बस्नेतको तर्क थियो – पूर्व तयारी तथा जगेडाका लागि पनि हामीले रित्ता रहेका ट्यांकीमा पानी भर्नुपर्छ ।
खानेपानी उपभोक्ता महासंघका अध्यक्ष लेखबहादुर कार्कीले मन्थलीको खानेपानी वितरण प्रभावकारी बनाउनका लागि समितिका अतिरित्त आयोजनाले धेरै काम गर्नुपर्नेमा जोड दिए । उनले करिव ३५ प्रतिशत पानी चुहावट भइरहेकोमा त्यसले व्यवस्थापन खर्च बढाइरहेको वताए । उनले चुहावट नियन्त्रण र थप क्षेत्रमा सेवा विस्तारको आवश्यकता रहेको बताए ।
मन्थली वडा नम्बर १ का अध्यक्ष नारायणदाश श्रेष्ठले मन्थलीको खानेपानी वितरण व्यवस्थित बनाउनका लागि वडा र नगरपालिकाका तर्फबाट सहयोग हुदै आएको र थप गर्नु परेमा तयार रहेको बताए । उनले चाडो भन्दा चाडो योजनालाई भरपर्दो वनाउनका लागि सवैले योगदान गर्नुपर्नेमा जोड दिए ।
समितिले हाल भलुवाजोर, मचवारीको सतही मुल र तामाकोशी किनारबाट लिफ्ट गरेर मन्थली क्षेत्रमा करिव १ हजार धारामा पानी दिदै आएको छ । वत्ति नभएको बेला पानीको वितरण ठप्प हुने गरेको छ । दिन विराएर पानी वितरण गर्दा समेत प्रयाप्त पानी नहुँदा उपभोक्ताहरुलाई समय तालिका निर्धारण गरेर पानी वितरण गर्न कठिनाई झेल्नु परेको समितिले जनाएको छ । समितिले अस्थायी रुपमा पाईप लाईन वितरण गरेकोले त्यसलाई व्यवस्थित गर्नु चुनौति रहेको बैठकमा चर्चा भएको थियो ।
