डम्बर निदाल
डडेल्धुरा -आन्तरिक राजश्व कार्यालय डडेल्धुराले चालु आर्थिक वर्षको पहिलो तीन महिनाको अवधीमा लक्ष्य भन्दा बढी राजस्व संकलन गरेको छ । डडेल्धुरा सहित सुदुरपश्चिम प्रदेश अन्तर्गतका महाकाली अञ्चलमा पर्ने बैतडी र दार्चुला जिल्ला पनि कार्य क्षेत्र रहेको आन्तरीक राजस्व कार्यालयले झण्डै ११ करोड राजस्व संकलन गरेको छ ।
आन्तरिक राजस्व कार्यालय डडेल्धुराले चालु आर्थिक बर्षको पहिलो त्रैमासिक अवधीमा झण्डै ११ करोड राजश्व सङ्कलन गरेको हो । चालु आर्थिक वर्षको तिन महिनामा १० करोड ९४ लाख राजश्व सङ्कलन गरेको आन्तरिक राजस्व कार्यालय डडेल्धुराले जनाएको छ । सङ्कलन भएको राजस्व अन्र्तगत आयकर तिन करोड ४६ लाख, अन्तशुल्क ८८ लाख र मुल्य अभिवृद्धी करबाट छ करोड ५९ लाख राजस्व सङ्कलन भएको कर अधिकृत तिलकराज बोगटीले बताए ।
आन्तरिक राजस्व कार्यालयले चालु आर्थिक वर्षमा ३८ करोड ५२ लाख राजस्व सङ्कलनको लक्ष्य लिएको छ । चालु आर्थिक वर्षको तिन महिनामा सङ्कलन भएको राजस्वले लक्ष्य सहजै प्राप्त गर्ने उनले बताए ।
पछिल्लो समय करदाताहरुमा चेतनाको विकास हुँदै गईरहेकाले राजस्व सङ्कलन लक्ष्य भन्दा बढी हुन थालेको आन्तरिक राजस्व कार्यालय डडेल्धुराले जनाएको छ । कोरना महामारीको सन्त्रासका कारण आर्थिक वृद्धी दर घटदै गएका बेला सरकारले कर असुलीमा अकल्पनीय सफलता हासिल गर्न थालेको जनाएको छ ।
