काठमाडौं – मौसम पूर्वानुमान महाशाखाले मनसुनको न्यून चापीय रेखा औसत स्थानभन्दा केही दक्षीणतिर रहेको जनाएको छ । महशाखाले मनसुनको उक्त न्यून चापीय रेखा विस्तारै माथि सरेर औसत स्थानमा आउने संभावना रहेको उल्लेख गरेको छ ।
आगामी २४ घण्टाको मौसम पूर्वानुमान गर्दै महाशाखाले त्यस अवधिमा मेघ गर्जन र चट्याङसहित वर्षाको सम्भावना रहेको जनाएको छ । त्यसैले मेघ गर्जन र चट्याङबाट बँच्नका लागि आवश्यक सतर्कता अपनाउन महाशाखाले अनुरोध गरेको छ ।
त्यस्तै देशको पश्चिमी पहाडी र पूर्वी भागका एक/दुई स्थानमा भारी वर्षाको सम्भावना रहेको उल्लेख गर्दै चुरेबाट बहने नदिमा पानिको बहाव आकस्मिक वृद्धि हुनसक्ने भएकाले सतर्क रहन पनि महाशाखाको अनुरोध छ ।
आगामी तीन दिनको मौसम पूर्वानुमान गर्दै महाशाखाले मंगलबार दिउँसो देशभर वदली रही केही स्थानमा मेघ गर्जन र चट्याङ्गसहित वर्षा हुने सम्भावना रहेको जनाएको छ । त्यस्तै मध्य तथा पूर्वी पहाडी भू-भागका एक/दुई स्थान साथै पश्चिमी तराईको एक/दुई स्थानमा भारी वर्षाको सम्भावना छ ।
मंगलबार राति देशभर वदली हुने तथा पूर्व, मध्य र पश्चिमका केही स्थानमा वर्षाको सम्भावना छ । यसका साथै पूर्वि तराईका एक/दुई स्थानमा भारी वर्षाको सम्भावना रहेको महाशाखाले जनाएको छ ।
बुधबार दिउँसो धेरैजसो स्थानमा आंशिकदेखि सामान्य वदली रही केही स्थानहरुमा मेघ गर्जन र चट्याङ्गसहित वर्षा हुनेछ । पहाडी भू/भागका एक/दुई स्थानमा भारी वर्षाको सम्भावना छ । बुधबार राति देशका धेरैजसो स्थानमा वदली रही केही स्थानमा वर्षा हुनेछ । पूर्व तथा पश्चिमी भू–भागका एक/दुई स्थानमा भारी वर्षाको सम्भावना छ ।
बिहीबार दिउँसो देशका धेरैजसो स्थानमा वदली रही केही स्थानहरुमा मेघ गर्जन र चट्याङ्गसहित वर्षा हुनेछ । पहाडी भू–भाग तथा तराईका एक/दुई स्थानमा भारी वर्षाको सम्भावना छ । बिहीबार राति धेरैजसो स्थानमा वदली रही केही स्थानमा वर्षा हुनेछ । पूर्वी तथा पश्चिमी भू–भागका एक/दुई स्थानमा भारी वर्षाको सम्भावना रहेको महाशाखाले जनाएको छ ।
