काठमाडौँ – जापानको आइची-नागोया सहरमा असोज ३ देखि १८ गतेसम्म आयोजना हुन गइरहेको २० औँ एसियाली खेलकुद (एसियाड) मा नेपालको राष्ट्रिय झण्डा फहराउन जाने नेपाली उसु टोलीलाई एक विशेष समारोहका बिच औपचारिक बिदाइ गरिएको छ। नेपाल उसु महासंघद्वारा आयोजित उक्त बिदाइ कार्यक्रममा प्रतियोगितामा सहभागी हुने खेलाडी, प्रशिक्षक तथा निर्णायकहरूलाई जितको शुभकामना दिँदै बिदाइ गरियो।
जापानमा हुने यस पटकको एसियाडमा नेपालबाट उसु खेलका कुल १० जना प्रतिभाशाली खेलाडीहरूले प्रतिस्पर्धा गर्दै छन्, जसमा ७ जना पुरुष र ३ जना महिला खेलाडी समाविष्ट छन्।
नेपालले उसुका दुवै प्रमुख विधा थाउलो र सान्सौँमा आफ्ना खेलाडीहरू मैदानमा उतार्दैछ।
सहभागी खेलाडीहरु विजय सिन्जाली, हरिप्रसाद गोले, राजीव तामाङ, सुस्मिता तामाङ, दीपक हमाल, सविता राई, रोहित चुनारा, अमर सुनार, सन्जिव महर्जन र रिता ठकुल्ला।
खेलाडीहरूलाई प्राविधिक रूपमा सक्षम बनाउन र उत्कृष्ट नतिजा निकाल्नका लागि प्रशिक्षकहरूको महत्त्वपूर्ण भूमिका रहनेछ। थाउलो टोलीको प्रशिक्षकका रूपमा प्रकाश महर्जन र सान्सौँ टोलीको प्रशिक्षकका रूपमा तुल्सीनन्द वज्राचार्यले टोलीको नेतृत्व गरिरहेका छन्। साथै, प्रतियोगितालाई निष्पक्ष रूपमा सञ्चालन गर्न र अन्तर्राष्ट्रिय स्तरमा देशको उपस्थिति जनाउनका लागि निर्णायकका रूपमा मन्जुर महर्जनको समेत सहभागिता रहनेछ।
उक्त बिदाइ कार्यक्रममा प्रतिनिधि सभाका सांसद प्रभा कार्की, राष्ट्रिय खेलकुद परिषद् (राखेप) का बोर्ड सदस्य पवन शाही, नेपाल उसु महासंघका महासचिव नवराज ढुंगाना बिश्वास, लगायत पदाधिकारीहरू, उसु मुख्य प्रशिक्षक, उसु प्रशिक्षकहरू तथा खेलकुदप्रेमी महानुभावहरूकाे उत्साहजनक उपस्थिति रहेको थियो। कार्यक्रमका प्रमुख अतिथि तथा अन्य वक्ताहरूले खेलाडीहरूलाई खेल भावना, अनुशासन र उच्च मनोबलका साथ मैदानमा उत्रिन प्रेरणा दिए। उनीहरूले अन्तर्राष्ट्रिय मञ्चमा नेपालको सिर उच्च राख्दै देशका लागि पदक जितेर फर्किने विश्वास व्यक्त गरे।
बिदाइ समारोहमा खेलाडी तथा अफिसियलहरूको हौसला अभिवृद्धि गर्नका लागि ‘संगथा इन्भल्भ टुगेदर’ नामक संस्थाले विशेष सहयोग पुर्याएको थियो। सो संस्थाको तर्फबाट प्रतियोगितामा सहभागी हुने सम्पूर्ण खेलाडी, प्रशिक्षक तथा निर्णायकहरूलाई आकर्षक टिसर्ट प्रदान गरी सम्मानित गरियो।
कडा मिहिनेत र लामो प्रशिक्षण पश्चात् जापान प्रस्थान गर्न लागेको नेपाली उसु टोली पदक जित्ने दृढ संकल्पका साथ उत्साही देखिएको छ। एसियाडमा नेपाली खेलाडीहरूको प्रदर्शनले देशको खेलकुद क्षेत्रलाई थप नयाँ उचाइमा पुर्याउने अपेक्षा महासंघले राखेको छ।
