काठमाडौं – नेकपा एमालेभित्र एकताका लागि सहमति बन्न ढिलाइ भइरहँदा अध्यक्ष एवं प्रधानमन्त्री केपी शर्मा ओलीले स्थायी कमिटी बैठक बोलाएका छन् ।
एकताका लागि कार्यदलस्तरमा सहमति गरेर स्थायी कमिटीबाट पारित गर्ने भनिए पनि सहमति नजुट्दै अध्यक्ष ओलीले बैठक बोलाएका हुन् । एमाले कार्यालय सचिव शेरबहादुर तामाङले ४ बजे बस्नेगरी स्थायी कमिटी बोलाइएको बताए ।
बैठकमा नेपाल पक्षलाई पनि बोलाइएको सचिव तामाङले बताए। नेपाल पक्ष अहिलेसम्म जाने नजाने टुंगो लागेको छैन।नेपाल पक्षका एक नेताले दिएको जानकारी अनुसार कार्यदलको बैठक नटुङ्गिएसम्म ओलीले बोलाएको बैठकमा जान नसकिने अन्नपूर्ण टाइम्सलाई बताए। ‘बैठकबारे हामीलाई थाहै छैन । बैठक हो भने पनि ३ बजे बोलाएर ४ बजे को जान्छ ?’, ति नेताले भने।
एकताका लागि गठन गरिएको कार्यदलका सदस्य सुवासचन्द्र नेम्वाङले आज बिहान ८ बजेसम्म ‘सुखद खबर’ आउने जानकारी पत्रकारलाई दिएका थिए । यद्यपि अहिलेसम्म कार्यदलले सहमतिको मस्यौदालाई पूर्णता दिन सकेको छैन ।
वरिष्ठ नेता माधवकुमार नेपाल पक्षले राखेका केही मागबारे अझै सहमति जुट्न सकेको छैन । सहमति नजुट्दै ओलीले स्थायी कमिटी बैठक बोलाउनुलाई अर्थपूर्ण रूपमा हेरिएको छ ।
एमालेभित्रको विवाद मिलाउन दुई पक्षबाट ५–५ जना सदस्य रहेको १० सदस्यीय कार्यदलले केही दिनयता सिंहदरबारस्थित अर्थमन्त्रालयमा वार्ता गर्दै आइरहेको छन् ।
१० सदस्यीय कार्यदलले पार्टी एकताका लागि नाै बुँदे सहमतिको मस्यौदा तयार पारेको जानकारी दिइएको छ। उक्त सहमति पार्टीको स्थायी कमिटीले अनुमोदन गर्ने बताइएको छ। त्यसका लागि संयुक्त स्थायी कमिटी बस्न लागेको स्रोतले बतायो।
