पछिल्लो पाँच महिनाको अवधिमा सैनिक कर्मचारीका लागी घर बनाउन नेपाली सेनाले ९० जनालाई ‘घर कर्जा’ दिएको छ । सैनिक कल्याणकारी कोषबाट ९० जनाले घरकर्जाका लागी दिएको निवेदन स्वीकृत गरेको नेपाली सेनाले पत्रकार सम्मेलन गरेर जानकारी दिएको छ ।
मंगलबार जंगी अड्डामा आयोजित पत्रकार सम्मेलनमा सैनिक कल्याणकारी महानिर्देशनालयका महासेनानी पुरन घलेले भने–‘३ दशमलव ३२ प्रतिशत ब्याजदरमा ९० जनाको घर कर्जा आवेदन स्वीकृत गरिएको छ ।’प्रधान सेनापति प्रभुराम शर्माले सेनाका कमाण्ड समालेपछि सैनिक कल्याणकारी कार्यक्रमहरूमा सकलदर्जाको पहुँच वृद्धि गर्ने नीति सार्वजनिक गरेका थिए ।
प्रधान सेनापति कमाण्ड नीति तथा मार्ग निर्देशन–२०७८ अनुसार सेनामा १० वर्ष जागिर पुरा गरेकाले घर कर्जा पाउँछन् । घर कर्जा बापत कल्याणकारी कोषले ३२ लाख दिँदै आएको छ । ०७८ असोज यता ९० जना सैनिकले घर कर्जा लिएका हुन्।
त्यस्तै नेपाली सेनाको सैनिक कल्याणकारी कोषको सम्पत्ति ५९ अर्ब ९५ करोड ८९ लाख पुगेको छ । कोषमा जम्मा भएको रकम सेनाले २७ वटा ‘क’ वर्गका बैङ्कहरूमा मुद्दती निक्षेप राखेको छ ।
पत्रकार सम्मेलन गरेर कोषमा भएको रकम र लगानीबारे जानकारी दिएको छ । सैनिक कल्याणकारी महानिर्देशनालयका अनुसार २०७८ असार मसान्त सम्ममा बैङ्कहरूमा ५४ अर्ब १२ करोड ७५ लाख बैंकमा मुद्दती निक्षेप राखिएको छ । सेनाले ब्याजदरको प्रतिस्पर्धा गराएर रकम निक्षेप गर्दै आएको छ ।
स्कुल र मेडिकल कलेजमा सेनाले ५ अर्ब ८३ करोड १४ लाख लगानी गरेको छ । बैंक निक्षेप र स्कुल तथा कलेजमा गरिएको लगानी ५९ अर्ब ९५ करोड ८९ लाख पुगेको जङ्गी अड्डामा आयोजित पत्रकार सम्मेलनमा कल्याणकारी महानिर्देशनालयका महासेनानी पुरन घलेले जानकारी दिए ।
त्यस्तै, सैनिक हिताधिकारीका लागी नेपाल इन्भेस्टमेन्ट बैंकले लगानी गरेको लघुवित्त कार्यक्रमको रकम जोखिममा परेको छ । सैनिक कल्याणकारी कोषसँगको समन्वयमा इन्भेस्टमेन्ट बैंकले लगानी गरेको करिब ५ करोड कर्जा उठ्न बाँकी रहेको नेपाली सेनाले जनाएको छ । नेपाल इन्भेस्टमेन्ट बैंकले पूर्व सैनिक र बहालवाला सैनिकका परिवारलाई लक्षित गरेर सानो स्केलमा लगानी गरेको थियो । खराब कर्जा उठाउनेबारे छलफल भइरहेको नेपाली सेनाले जनाएको छ ।
