काठमाडौं । सुँगुरको मुटु प्रत्यारोपण गरिएका व्यक्तिको दुई महिनापछि ज्यान गएको छ ।
अमेरिकाको बाल्टिमोरका ५७ वर्षीय डेभिड बेनेटमा युनिभर्सिटी अफ मेरिल्याण्ड मेडिकल सेन्टरका चिकित्सकहरुले ७ जनवरीमा सुँगुरको मुटु सफलतापूर्वक प्रत्यारोपण गरेका थिए ।
मानिसमा सुँगुरको मुटु प्रत्यारोपण सफल हुनुलाई चिकित्सा क्षेत्रकै ठूलो सफलता मानिएको थियो । ८ मार्चको दिन डेभिड बेनेटको ज्यान गएको अस्पतालले जानकारी दिएको छ ।
अस्पतालले जारी गरेको विज्ञप्तिमा लेखिएको छ, ‘केही दिनयता उनको स्वास्थ्य अवस्था बिग्रदै गएको थियो । तर अन्तिम घण्टासम्म पनि आफ्ना परिवारका सदस्यहरुसँग कुराकानी गरेका थिए । उनलाई निको हुँदैन भन्ने जान्दाजान्दै पनि उनको उपचार जारी राखिएको थियो ।’
उनी एक बहादुर र महान बिरामी सावित भएका र उनले अन्तिमसमयसम्म लडाइ लडेका मुटु प्रत्यारोपण गर्ने चिकित्सक टोलीको नेतृत्व गरेका सर्जन बार्टले ग्रिफिथले बताएका छन् ।
