नेपाल प्रहरी महानिरीक्षक (आईजीपी) धीरजप्रताप सिंहले एआईजी विश्वराज पोखरेलको थप बिदा अस्वीकृत गरेका छन् । यसअघि लिएको बिदा सकिएपछि पुनः बिदाका लागि निवेदन दिएका पोखरेलको बिदा आईजीपी सिंहले अस्वीकृत गरेका हुन् ।
बुधबार पोखरेलले प्रहरी प्रधान कार्यालयमा सहयोगी पठाएर बिदाका लागि निवेदन बुझाएका थिए ।
सम्बन्धितले बिदा माग्नुपर्ने नियमअनुसार सिंहले पोखरेलको बिदा अस्वीकृत गरेर घर ठेगानामा जानकारी गराउन निर्देशन दिएका छन् ।
प्रहरी प्रवक्ता विष्णु केसीले बिदा अस्वीकृत भएको पुष्टि गर्दै घर ठेगानामा जानकारी गराउन निर्देशन दिएको बताए ।
आईजीपीको दाबेदार पोखरेल आईजीपी हुन नपाएपछि गत वैशाख १९ देखि बिदामा थिए । हालैको मन्त्रिपरिषद् बैठकको निर्णयअनुसार मानव स्रोत विभागबाट प्रदेश समन्वय विभागमा सरुवा भएका उनलाई मनसुनको मौसममा बिदा दिनु पनि अनुपयुक्त हुने आईपीपीको निष्कर्ष छ ।
सरकारले आइजिपी धिरजप्रताप सिंहलाई नियुक्ति दिएपछि पोखरेलले सर्वोच्च अदालतमा रिट दायर गरेका थिए। तर सो मुद्दाको किनारा लागिसकेको छैन। आफूभन्दा कनिष्ठलाई आइजिपी बनाएपछि पोखरेल असन्तुष्ट छन्।
जसकारण उनले थप बिदा माग गरेका हुन्। उनले थप १० दिनको लागि बिदा मागेका थिए ।
यसअघि उनले तत्कालीन आइजिपी शैलेश थापा क्षेत्रीसमक्ष बिदा स्वीकृत गराएका थिए। उनले ३० दिनको बिदा स्वीकृत गराएका थिए।
आइजिपी नियुक्तिप्रति अर्का एआइजी सहकुल थापा पनि असन्तुष्ट थिए। उनी पनि त्यसविरूद्ध अदालत जाने सोचमा थिए। तर उनी भने काममा फर्किएका थिए।
