बागमती प्रदेश सरकार परिवर्तनको कसरत सुरु भएको छ । सत्तारुढ गठबन्धनका दलहरु बीच पूर्वसहमति अनुसार सरकारको नेतृत्व फेर्न कसरत सुरु भएको हो ।

गत कात्तिक ११ गते गठबन्धनबाट सत्तारोहण गरेका नेकपा एकीकृत समाजवादी पार्टीका राजेन्द्र प्रसाद पाण्डे र नेपाली काँग्रेस बागमती प्रदेश संसदीय दलका नेता इन्द्रबहादुर बानियाँबीच आधाआधा समय सरकारको नेतृत्व गर्ने सहमती भएको थियो । उक्त सहमति कार्यान्वयन गर्नतर्फ मुख्यमन्त्री पाण्डे सकारात्मक नदेखिएपछि गठबन्धनभित्रै सत्ता संघर्ष सुरु भएको हो ।

बागमती प्रदेशले आगामी आर्थिक वर्षको बजेट आज पास गरेको छ। यसअघि बजेट पास हुनेबित्तिकै मुख्यमन्त्री परिवर्तन हुने नेताहरुले बताएका थिए।

पूर्वसहमतिअनुसार चुनावी सरकारको नेतृत्व नेपाली काँग्रेसले पाउनुपर्ने भन्दै संघर्ष सुरु गरिएको प्रदेश सरकारका एक मन्त्रीले बताए । उनका अनुसार आगामी आर्थिक वर्ष २०७९/०८० को बजेट पास भएलगत्तै पूर्वसहमतिअनुसार काँग्रेस संसदीय दलका नेता बानियाँ मुख्यमन्त्री बन्नुपर्ने भन्दै संघर्ष सुरु गरिएको हो ।

 मुख्यमन्त्री पाण्डेले सहज रुपमा सरकारको नेतृत्व गर्ने विषयको विगतको सहमती कार्यान्वयन गर्ने नदेखेपछि उनीहरु कांग्रेस र माओवादीले आफ्ना सांसदहरुको हस्ताक्षर संकलनमा जुटेका हुन् ।

काँग्रेसका सांसदहरुले सहमति अनुसार तत्काल मुख्यमन्त्री पाण्डेले राजीनामा गरेर सहजै सत्ता हस्तान्तरण गर्नुपर्ने माग गरेका थिए । उनीहरुको मागलाई बेवास्ता गर्दै मुख्यमन्त्री पाण्डेले केन्द्रीय नेतृत्वको निर्देशन कुर्ने बताएपछि काँग्रेस र माओवादी केन्द्रका सांसदहरु हस्ताक्षर संकलन जुटेको माओवादी केन्द्रका एक सांसदले बताए ।

‘तत्कालीन समयमा आलोपालो अनुसार काँग्रेस र एकीकृत समाजवादीले ६/६ महिना सरकारको नेतृत्व गर्ने सहमती भएको थियो । सो सहमती बाहिर आइसकेको छ,’ उनले भने, ‘सोहीअनुसार हामीले विगतको ६ महिना एकीकृत समाजवादीलाई सरकारको नेतृत्व दिएर सघाएका थियौँ । अब सरकारको नेतृत्व गर्ने पालो हाम्रो हो । एकीकृत समाजवादीले सहमति कार्यान्वयन गर्नुपर्छ ।’

उनका अनुसार आगामी केही दिनभित्रै प्रदेशमा मुख्यमन्त्री फेरिने गरी काँग्रेस छलफलमा सक्रिय रहेको छ । काँग्रेसले मुख्यमन्त्री पाउने विषयमा केन्द्रीय तहसम्म लबिङ भइरहेको उनले बताए ।

यता नेकपा माओवादी केन्द्र पनि प्रदेशको मुख्यमन्त्री पद सहमती अनुसार काँग्रेसले पाउनुपर्ने पक्षमा देखिएको छ । पूर्वसहमति अनुसार सरकारको नेतृत्व काँग्रेसले पाउनुपर्ने माओवादी केन्द्रका एक नेताले बताए । सहमती कार्यान्वयनबाट गठबन्धनको कुनैपनि दलहरु पछि हट्न नहुने उनको भनाइ छ ।

बागमती प्रदेश सरकार परिवर्तनको लागि कुल १०७ जना सांसद् मध्ये ५४ जना सांसद्को समर्थन आवश्यक पर्छ । प्रदेशसभामा माओवादी केन्द्रका २३, काँग्रेसका २२, एकीकृत समाजवादीका १३, विवेकशील साझा पार्टीका ३, नेमकिपाका २, राप्रपाका २ र जसपाको एक सांसद् रहेको छ भने प्रदेशसभामा नेकपा एमालेका ४३ जना सांसद् रहेका मध्ये २ जना स्थानीय तहको निर्वाचनमा उम्मेदवार बनेपछि ४१ जना मात्र कायम रहेका छन् ।

 

LEAVE A REPLY

Please enter your comment!
Please enter your name here