काठमाडौं – विश्वव्यापी कोरोनाको महामारीको बढ्दो जोखिमलाई मध्यनजर गर्दै सार्वजनिकस्थल, गोष्ठि, सेमिनार, विद्यालय लगायतका क्षेत्रमा अनिवार्य मास्क प्रयोग गर्न अनुरोध गरिएको छ ।
नेपालमा केही सातायता कोरोना संक्रमित हुनेको संख्या दैनिक बढ्न थालेपछि स्वास्थ्य तथा जनसंख्या मन्त्रालयले बिहीबार एक सूचना जारी गर्दै कोरोनाको जोखिम कम गर्नका लागि व्यक्ति, संस्था, निकाय, कार्यालय, तह र तप्काले आ–आफ्नो स्थानमा सावधानी अपनाउन अनुरोध गरेको हो ।
मन्त्रालयले सबै सरकारी तथा गैह्र सरकारी कार्यालयहरु तथा मानिसको भिडभाड हुने स्थानहरुमा अनिवार्य मास्क प्रयोग गर्न तथा गराउन र स्यानिटाइजरको व्यवस्था गर्न अनुरोध गरेको छ ।
त्यस्तै विमानस्थल, हवाई लगायत सार्वजनिक क्षेत्र, गोष्ठि सेमिनार, बैठक जस्ता भिडभाड हुने स्थान, विद्यालय, विश्वविद्यालय, धार्मिकस्थल, भिडभाड हुने प्रकृतिका व्यवसाय तथा मनोरन्ज स्थलहरु, स्टेडियम आदि सार्वजनिक स्थलमा अनिर्वा मास्क प्रयोग र स्यानिटाइजरको व्यवस्था गर्न अनुरोध गरेको छ ।
विश्वमा ओमिक्रोनको उपप्रजाति बिए वान र बिए टुलाई बिए फाइभले प्रतिस्थापन गर्दै गएको चिकित्सकहरुको भनाइ छ । विभिन्न अध्ययनहरुले बिए फाइभ भेरिएन्ट ओमिक्रोनका अन्य प्रजाति भन्दा बढी सङ्क्रामक भएकाले जनस्वास्थ्यको मापदण्ड अपनाउन मन्त्रालयका सहप्रवक्ता डा अधिकारीले सबैमा आग्रह गरेका छन् ।
