नयाँ सरकार गठनका लागि बहुमतको दाबी पेस गर्न दलहरूलाई राष्ट्रपति कार्यालयले दिएको समय आज बेलुका सकिँदैछ । राष्ट्रपति विद्यादेवी भण्डारीले सात दिनभित्र नयाँ सरकार गठनका लागि पुस ३ गते आह्वान गरेकी थिइन् ।
नयाँ सरकार गठनका लागि नेपालको संविधानको धारा ७६ को उपधारा (१) बमोजिम कुनै पनि दलले स्पष्ट बहुमत प्राप्त नगरेपछि संविधानको धारा ७६ को उपधारा (२) अनुसार प्रतिनिधिसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमतप्राप्त गर्न सक्ने प्रतिनिधिसभाको सदस्यलाई प्रधानमन्त्रीमा नियुक्त गर्ने व्यवस्था रहेको छ ।
सोही व्यवस्थाअनुसार राष्ट्रपतिले पुस १० गते (आज) बेलुका ५ बजे भित्र दाबी पेस गर्न दलहरूलाई आह्वान गरेकी थिइन् । तर यो समय सकिन लाग्दा पनि दलहरूबीच बहुमतका लागि अहिलेसम्म सहमति जुटेकाे छैन ।
सहमतिकाे प्रयासका लागि सत्ता गठबन्धनकाे बैठक आज बिहान फेरि बस्दैछ । सत्ता गठबन्धनमा आलाेपालाे सरकारकाे नेतृत्व गर्ने समझदारी जुटे पनि पहिलाे चरणमा काे प्रधानमन्त्री बन्ने भन्नेमा सहमति जुटेकाे छैन । माओवादी केन्द्रले आफूलाई पहिले प्रधानमन्त्री नदिए गठबन्धन भंग हुन सक्ने बताइसकेकाे छ ।
कांग्रेसले भने ठूलाे दलका हैसियतले पहिलाे चरणकाे प्रधानमन्त्री माओवादीलाई छाड्न नसकिने बताएकाे छ । यद्पि प्रधानमन्त्री पदका लागि गठबन्धनकाे हलाे नअड्किने कांग्रेस नेता ज्ञानेन्द्रबहादुर कार्की बताउँछन् । हिजाे साँझ बालुवाटारमा बसेकाे बैठकमा सहमति नजुटेपछि सत्ता गठबन्धन भंग हुने अवस्थामा पुगेकाे छ ।
माओवादी केन्द्रका नेताहरूले पहिले प्रधानमन्त्री आफूलाई दिने विषयमा कांग्रेस सहमत नभए गठबन्धन टुंगिने बताएका थिए । माओवादीले गठबन्धन टुंगिनेसम्मकाे कुरा राखेपछि कांग्रेसले पनि एमालेकाे साथ खाेजेकाे छ ।
प्रधानमन्त्री शेरबहादुर देउवाले शनिबार राति नै नेता विमलेन्द्र निधिलाई एमाले अध्यक्ष केपी शर्मा ओलीसँग भेटका लागि बालकोट पठाएका छन् । बालकाेट वार्ताकाे विवरण सार्वजनिक भइसकेकाे छैन ।
