अर्जेन्टिनी स्ट्राइकर लियोनल मेस्सीले बालोन डि ओरको उपाधि जितेका छन्। अमेरिकी क्लब इन्टर मियामीका ३६ वर्षे स्ट्राइकर मेस्सीले म्यानचेस्टर सिटीका नर्वेजियन स्ट्राइकर अर्लिङ हल्याण्डलाई पछि पार्दै प्रतिष्ठित पुरस्कार जितेका हुन्।
तेस्रो स्थानमा फ्रेन्च स्ट्राइकर किलियन एम्बाप्पे र चौथो स्थानमा केभिन डी ब्रुइना रहे। यससँगै मेस्सीले आठौं पटक बालोन डिओर जितेका छन्। जितपछि मेस्सीले फेरि पनि उपाधि जित्ने ‘मोमेन्ट’ महसुस पाउँदा खुसी लागेको बताए। उनले इतिहासको राम्रो टोली आफूसँग हुँदा उपलब्धिहरु हासिल गरेको बताए।
कतार विश्वकपमा सानदार प्रदर्शन गर्दै अर्जेन्टिनालाई च्याम्पियन बनाएका मेस्सी सबैभन्दा धेरै पटक बालोन डि ओर जित्ने खेलाडी हुन्। उनले सर्वाधिक ८ पटक बालो डि ओर जित्दा क्रिस्टियानो रोनाल्डोले ५ पटक जितेका छन्। यसपाला भने रोनाल्डो सर्टलिस्टमा पनि परेनन्।
त्यस्तै उत्कृष्ट गोलकिपर अर्जेन्टिनाकी इमिलियानो मार्टिनेज बन्दा उत्कृष्ट क्लब म्यानचेस्टर सिटी बनेको छ। त्यस्तै महिला तर्फको उपाधि स्पेनकी एइताना बोनमतीले अस्ट्रेलियाकी साम केरलाई पछि पार्दै जितिन्।
