काठमाडौँ – कान्ति बाल अस्पतालमा रहेको बालबालिका तथा किशोरकिशोरी मानसिक स्वास्थ्य इकाइको अन्तरंग सेवाको समुद्घाटन गरिएको छ । स्वास्थ्य तथा जनसंख्या मन्त्री प्रदिप पौडेलले बुधबार एक कार्यक्रमका बीच १६ शैय्याको अन्तरंग सेवाको उद्घाटन गरेका हुन्।
मन्त्री पौडेलले अन्तरंग सेवा विभागको अवलोकन गरी ईकाईबाट दिँदै आएको टेलिमेडिसिन सेवाको जानकारी समेत लिएका थिए । यसअघि यही बर्षको शुरुवातमा लगनखेलस्थित मानसिक अस्पतालले किशोरकिशोरी मानसिक स्वास्थ्य ईकाई संचालनमा ल्याएको थियो । तर बालबालिकाको मानसिक स्वास्थ्योपचारलाई लक्षित गरेर अन्तरंग सेवा संचालनमा आएको भने यो पहिलो अवसर हो ।
सन् २०१५ को ठूलो भुइचालोपछि सिविन नेपालले, फोरुट नर्वेसँगको साझेदारी र कान्ति बाल अस्पतालको सहयोगमा अस्पताल प्रांगणमै नेपालमा सबैभन्दा पहिलो बालबालिका तथा किशोरकिशोरी मानसिक स्वास्थ्य ईकाई संचालनमा ल्याएको हो । पछि फोरुट नर्वे र अरु साझेदार संघसंस्थासँगको सहकार्यमा सिविन नेपालले अस्पताल प्रांगणमै छुट्टै भवनको निर्माण गरी सन् २०२१ को जनवरीेदेखि बालबालिका तथा किशोरकिशोरीलाई मानसिक स्वास्थ्य सेवा उपलब्ध गराउँदै आएको छ । यही क्रममा आज अन्तरंग सेवाको पनि औपचारिक थालनी भएपछि पनि बालबालिकाको मानसिक स्वास्थ्य उपचारमा थप सहज बन्ने भएको छ।
