भारतीय स्थल सेनाध्यक्ष जनरल उपेन्द्र द्विवेदी नेपालको औपचारिक भ्रमणमा आउने भएका छन् । ५ देखि ९ मंसिरसम्म उनी नेपाल भ्रमणमा आउन लागेको नेपाली सेनाले जानकारी दिएको छ ।
भारतीय सेनाध्यक्षलाई ६ मंसिरमा राष्ट्रपति रामचन्द्र पौडेलले शीतलनिवासमा आयोजित विशेष समारोहमा नेपाली सेनाको मानार्थ जनरलको दर्ज्यानी चिह्न लगाइदिने कार्यक्रम तय भएको छ ।
द्विवेदी प्रधानसेनापति अशोकराज सिग्देलको औपचारिक निमन्त्रणामा आउन लागेका हुन् । जनरल द्विवेदीले सैनिक मञ्च टुँडिखेलस्थित वीर स्मारकमा श्रद्धाञ्जली अर्पण, जंगी अड्डामा सम्मानगारत निरीक्षण, प्रधानसेनापति सिग्देलसँग भेटघाट एवं छलफलगायत कमान्ड तथा स्टाफ कलेजका शिक्षार्थीसँग अन्तरक्रिया र पश्चिम पृतना हेडक्वार्टर पोखराको भ्रमण गर्ने कार्यक्रम छ ।
‘भ्रमणको मुख्य अंशका रूपमा नेपाली सेना र भारतीय सेनाबिचको परम्पराअनुसार भारतीय सेनाध्यक्ष जनरल द्विवेदीलाई राष्ट्रपति रामचन्द्र पौडेलले ६ मंसिरमा एक विशेष समारोहबिच नेपाली सेनाको मानार्थ महारथी दर्जा प्रदान गर्ने कार्यक्रम रहेको छ,’ सैनिक जनसम्पर्क तथा सूचना निर्देशनालयले भनेको छ । भारतीय सेनाध्यक्षले प्रधानमन्त्री केपी ओली र रक्षामन्त्री मानवीर राईसँग शिष्टाचार भेट गर्ने कार्यक्रम छ ।
