पोखरा – उपप्रधानमन्त्री एवं शहरी विकास मन्त्री प्रकाशमान सिंहले बिआरआईकाे विषयले सरकारमा समस्या नआउने बताउनुभएकाे छ । नेपाली कांग्रेस गण्डकी प्रदेशले शनिबार पाेखरामा आयाेजना गरेकाे कार्यक्रममा बाेल्दै उहाँले बिआरआईमा नेपाली कांग्रेस र नेकपा एमालेबीच फरक मत नरहेकाे बताउनुभयाे ।
अहिले देशकाे अर्थतन्त्रले थप ऋण धान्न सक्ने अवस्था नरहेकाे भन्दै उहाँले कांग्रेस अहिले अनुदानकै पक्षमा रहेकाे बताउनुभयाे । उपप्रधानमन्त्री सिंहले कुनै याेजनामा ऋण लिएर काम गर्दा तिर्न सक्ने अवस्थामा ऋण लिन सकिने भएपनि अहिले नै ऋण लिइहाल्ने अवस्था नरहेकाे बताउनुभयाे । प्रधानमन्त्री केपी ओलीकाे चीन भ्रमणका क्रममा उठाउने विषयमा कांग्रेस- एमालेले संयुक्त रूपमा नै एजेण्डा तयार गरेकाे पनि उहाँले बताउनुभयाे । यसअघि चीनले दिने घाेषणा गरेकाे अनुदान लिनका लागि सरकारले पहल गर्ने पनि उहाँका भनाई थियाे ।
त्यस्तै उहाँले सरकार ढल्छ भनेर अफवाह फैलाइएपनि त्यसमा सत्यता नरहेकाे दाबी गर्नुभयाे । ` कांग्रेस सभापती शेरबहादुर देउवा बाेलीमा इमानदार हुनुहुन्छ भन्ने कुरा सबैलाई थाहा छ । प्रधानमन्त्रीजीले सहमति अनुसार हस्तान्तरण हुने बताइरहनुभएकाे छ । सरकारमा समस्या छैन ,´ उहाँले भन्नुभयाे । राजनीतिक स्थायीत्व र स्थीरताकाे जगमा आर्थिक समृद्धि र विकासनै सरकारकाे प्रमुख प्राथमिकता रहेकाे पनि उपप्रधानमन्त्री सिंहले बताउनुभयाे ।
त्यस्तै, उहाँले संघियताकाे मर्मअनुसार तल्लाे तहमा शक्ति हस्तान्तरण नहुँदा अहिले संघीयतामा नै प्रश्न उठेकाे बताउनुभयाे । उपप्रधानमन्त्री सिंहले संघीयतालाई बलियाे बनाउन संविधानकाे व्यवस्थाअनुसार प्रदेश र स्थानिय तहलाई अधिकार सम्पन्न बनाउनुपर्नेमा उहाँले जाेड दिनुभयाे । असहज अवस्थामा देशलाई कांग्रेसले नै निकास दिएकाे चर्चा गर्दै अब पनि देशकाे आर्थीक समृद्धि र विकास कांग्रेसले नै गर्ने र त्यसका लागि सुदृढ र एकतावद्द कांग्रेस बनाउनुपर्नेमा जाेड दिनुभयाे ।
