काठमाडौँ – सत्यनारायणबहादुर श्रेष्ठ स्मृति मिडिया कप फुटसल प्रतियोगिताको उपाधि वर्ल्ड नेवा अर्गनाइजेसन (डब्ल्यूएनओ) नेपाल च्याप्टरले जितेको छ । फाइनलमा राष्ट्रिय समाचार समिति (रासस)लाई सडन डेथमा ४–३ गोलले हराउँदै डब्ल्यूएनओ नेपाल च्याप्टरले उपाधि जितेको हो । निर्धारीत समयको खेल १–१ को बराबरीमा सकिएपछि च्याम्पियनको निर्णय पेनाल्टी सुटआउटबाट भएको थियो ।
यसअघि सेमिफाइनलमा डब्ल्यूएनओ नेपाल च्याप्टरले ललितपुर वडा १६ कलाकार समितिलाई १–० र राससले टिम एभिएमलाई पेनाल्टी सुटआटमा ३–२ ले पराजित गरेका थिए ।
रासस र एभिएमबिचको निर्धारीत समयको खेल गोलरहित बनेको थियो । तेस्रो स्थानका लागि भएको खेलमा कलाकार समितिले टिम एभिएमलाई ४–२ ले हरायो । दुई समूहबाट शीर्ष दुई–दुई टिम सेमिफाइनलमा पुगेका हुन् ।
प्रतियोगितामा नौ टिमको सहभागिता रहेको थियो । नेवाः पत्रकार राष्ट्रिय दबु ए, नेपाल पत्रकार राष्ट्रिय दबु बी, राष्ट्रिय फोटो पत्रकार समूह, नेवाः कलाकार टिम र नेपाल आदिवासी जनजाति पत्रकार महासंघ (फोनिज) समूह चरणबाटै बाहिरिएको थियो ।
सो प्रतियोगितामा विजेता टिमका सुमन महर्जन उत्कृष्ट गोलरक्षक, फोनिजका किरण राई सर्वाधिक गोलकर्ता र टिम एभिएमका पुरुषोत्तम वज्राचार्य सर्वश्रेष्ठ खेलाडी चुनिए । यसैगरी प्रतियोगिताअन्तर्गत नेवाः महिला पत्रकार टिम र नेवाः महिला कलाकारबिच मैत्री खेल पनि खेलिएको थियो । जसमा पत्रकार टिम २–१ ले विजयी भएको थियो
नेवाः पत्रकार राष्ट्रिय दबु (एनएफएनजे ) ले नेपालको पत्रकारिता क्षेत्रका अग्रज सत्यनाराण बहादुर श्रेष्ठको स्मृतिमा प्रतियोगिता आयोजना गरिएको हो ।
आज भएको प्रतियोगिताको प्रमुख अतिथिको रुपमा ललितपुर महानगरपलिका -५ का अध्यक्ष विकासमान श्रेष्ठले पेनाल्टी बल प्रहर गर्दै खेलको शुभारम्भ गरेका थिए । जसमा गोलकिपरको भूमिकामा दबुका अध्यक्ष नृपेन्द्रलाल श्रेष्ठ थिए।
