काठमाडौं : ‘समानताका लागि बुलन्द आवाज’ भन्ने मूल नाराका साथ महिला पत्रकारको टोली सगरमाथा आरोहण गर्दैछ । यही क्रममा टोलीले शनिबार अन्तरक्रिया कार्यक्रम गरेको छ ।
जीवन जिउने क्रममा मान्छेले सुख र दुःखका धेरै सगरमाथा चढेको हुन्छ । आफूहरू पनि महिलाका पक्षमा केही सहयोग गर्ने उद्देश्यका साथ सगरमाथाको आरोहण गर्न लागेको टोलीका सदस्यहरूले बताए । टोलीमा कल्पना महर्जन, रोसा बस्नेत, प्रियालक्ष्मी कार्की, देउराली चाम्लिङ, रोजिता बुद्धाचार्य गरी पाँचजना महिला पत्रकारसँगै १८ जना महिला सगरमाथा आरोहण गर्दैछन् । उनीहरूले पर्वतारोहणसम्बन्धी ताजा जानकारी खोज्ने र हिमाल चढ्दा चढ्दैको लाइभ भिडियोसमेत प्रसारण गर्ने जानकारी दिए ।
सगरमाथा नेपालीको गौरवका साथै चुनौती पनि हो भन्ने जानकारी दिँदै सगरमाथाको शान जोगाउन कोसिस गर्ने उद्देश्य रहेको पनि उनीहरूले बताए । पर्वतारोहणबाट फर्किएपछि पढ्न नपाएका बालबालिकाका लागि ठोस काम गर्ने योजना रहेको पनि टोलीका सदस्यहरूले जानकारी दिए ।
