काठमाडौं – जय नेपाल कप दक्षिण एसियाली विश्वविद्यालय टी–२० क्रिकेट प्रतियोगिता नेपालसहित भारत र बंगलादेशका आठ टिम प्रतिस्पर्धा गर्ने भएका छन् । आयोजक नेपाल विद्यार्थी संघ (नेविसंघ(ले बिहीबार पत्रकार सम्मेलन गर्दै प्रतियोगितामा नेपालका चार, भारतका तीन र बंगलादेशबाट एक टिम सहभागी हुने पक्का गरेको हो ।
खेल ७ माघबाट कीर्तिपुरस्थित त्रिवि क्रिकेट मैदानमा हुनेछ । “हामीले खुल्ला छनोटबाट टिम छनोट गरेका हौँ । २०० बढी विश्वविद्यालयलाई प्रस्ताव गरेको हौँ,” प्रतियोगिताको संयोजक गणेश थापाले जानकारी दिए ।
आयोजकले प्रतियोगितामार्फत जलवायु परिवर्तनको मुद्दालाई एकजुट हुने मञ्चको रूपमा लिएको छ । नेपालका चार टोली त्रिभुवन विश्वविद्यालय, काठमाडौं विश्वविद्यालय, मध्यपश्चिम विश्वविद्यालय र पूर्वाञ्चल विश्वविद्यालय छन् । भारतबाट दिल्ली विश्वविद्यालय, लखनऊ विश्वविद्यालय, बाबासाहेब भीमराव, बिहार विश्वविद्यालय तथा बंगलादेशको ढाका विश्वविद्यालयले सहभागी हुनेछन् । कुल ९ दिनसम्म चल्ने प्रतियोगिता लिग कम नकआउटका आधारमा सञ्चालन हुनेछ ।
सहभागी टोलीलाई दुई समूहमा विभाजन गरिएको छ । समूहका शीर्ष दुई टोलीले सेमिफाइनलमा स्थान बनाउनेछ । अध्यक्ष दुजाङ शेर्पाले प्रतियोगिताको विजेताले १५ लाख र उपविजेताले १० लाख रूपैयाँ पाउने जनाए । पाँच लाख बराबरको पुरस्कार भने विधागततर्फ उत्कृष्टले पाउने अध्यक्ष शेर्पाले जनाएका छन् । आयोजकले प्रतियोगिताको विजेतालाई सर्वोच्च शिखर सगरमाथाको सुन्दर दृश्य अवलोकन गराउने बताएको छ । कान्छा पर्वतारोही निमा रिन्जी शेर्पा प्रतियोगिताको ब्रान्ड एम्बासडर नियुक्त भएका छन् ।
