काठमाडौँ – नेकपा माओवादी केन्द्रका अध्यक्ष पुष्पकमल दाहाल प्रचण्डका स्वकीय सचिव रमेश मल्ल सचिवालयबाट बाहिरिएका छन् । मल्लले सामाजिक सञ्जाल फेसबुकमार्फत आइतबारदेखि अध्यक्ष प्रचण्डको स्वकीय सचिवको जिम्मेवारीबाट बाहिरिएको जानकारी दिएका हुन् ।
उनले भनेका छन् : ‘अध्यक्ष प्रचण्डको स्वकीय सचिवको रूपमा तीन वर्ष तीन महिना पूरा गरी पार्टी केन्द्रीय कार्यालयको निर्णयअनुसार सचिवालयको यात्राविराम गरेको छु।’
मल्लले खुमलटारदेखि बालुवाटार र बालुवाटारदेखि खुमलटारसम्म सचिवालयको निकट टिममा रहेर सहकार्यको अवसर प्रदान गर्ने सचिवालय टिमका गंगा दाहाल, सन्तकुमार दरै लगायत सिंगो टिमप्रति हार्दिक आभार समेत व्यक्त गरेका छन् ।
प्रचण्डको सचिवालय प्रमुखमा भने गोविन्द आचार्यलाई लगिएको छ ।
हालका सचिवालय प्रमुख रमेश मल्ललाई अन्यत्रको जिम्मेवारी दिइएको छ । यस्तै प्रचण्डको सचिवालयमा सन्तु दराई, गंगा दाहाल, गोकर्ण प्रसाद भट्ट र विश्वदीप पाण्डेलाई पनि राखिएको माओवादी स्रोतले बतायो । यसबारे आधिकारिक निर्णय गरेर आइतबार नै मातहतका कमिटीलाई पत्राचार गरिएको स्रोतको भनाइ छ ।
