काठमाडौं – नेपालले ‘फोर नेसन्स कप’ अन्तर्राष्ट्रिय महिला फुटबल प्रतियोगिताको फाइनलमा स्थान बनाएको छ। दशरथ रंगशालामा बिहीबार भएको खेलमा नेपालले लेबनानलाई १-० गोलले पराजित गर्दै उपाधि यात्रा तय गर्यो।
नेपालको कठिन जितमा सावित्रा भण्डारी ‘साम्बा’ ले ४२औँ मिनेटमा निर्णायक गोल गरिन्। खेलभरि लेबनानले दुई उत्कृष्ट गोल अवसर गुमायो, विशेष गरी इन्जुरी समयमा बारमा लागेको प्रहार गोलमा परिणत हुन सकेन।
नेपालले पहिलो खेलमा किर्गिस्तानलाई १-० ले पराजित गरेको थियो। लगातार दोस्रो जितसँगै नेपालले ६ अंक जोड्दै फाइनलमा स्थान पक्का गर्यो। यसैबीच, म्यानमार पनि फाइनल पुगेको छ। बिहीबार नै म्यानमारले किर्गिस्तानलाई ५-० को फराकिलो अन्तरले हराउँदै लगातार दोस्रो जित निकालेको थियो। म्यानमारले पहिलो खेलमा लेबनानलाई ३-१ ले हराएको थियो।
चार राष्ट्र सम्मिलित प्रतियोगिताबाट किर्गिस्तान र लेबनान बाहिरिएका छन्। अखिल नेपाल फुटबल संघ (एन्फा) ले यस प्रतियोगितालाई आगामी एएफसी महिला एसियन कप २०२६ छनोट र फिफा महिला विश्वकप २०२७ को छनोटको तयारीका रूपमा लिएको छ।
