काठमाडौं – एपीएफ एफसीले ट्राइब्रेकरमा उज्बेकिस्तानको ब्ल्याक बुल्स एफसीलाई पराजित गर्दै केपी ओली कप च्याम्पियनसिप फुटबलको क्वार्टरफाइनलमा स्थान सुरक्षित गरेको छ। आइतबार एन्फा कम्प्लेक्समा भएको खेलमा एपीएफले ४–३ को जित निकाल्दै अगाडि बढ्ने अवसर प्राप्त गर्यो।
निर्धारित समयमा दुवै टोलीले गोल गर्न असफल भएपछि खेल ट्राइब्रेकरमा धकेलिएको थियो। ट्राइब्रेकरमा एपीएफका गोलकिपर एन्जल श्रेष्ठ नायक सावित भए, जसले ब्ल्याक बुल्सका दुई प्रहार रोक्दै टिमलाई जित दिलाए।
ब्ल्याक बुल्स यसअघि पोखरामा सम्पन्न २४औं संस्करणको आहा रारा गोल्डकपको विजेता टोली हो। तर, यो खेलमा भने उनीहरू एपीएफसँग पराजित हुन पुगे। अब एपीएफले सेमिफाइनल प्रवेशका लागि संकटासँग प्रतिस्पर्धा गर्नेछ।
राष्ट्रिय युवा संघ नेपालको आयोजनामा सुरु भएको प्रतियोगितामा ९ टोलीले सहभागिता जनाएका छन्। फागुन १८ गतेसम्म चल्ने प्रतियोगितामा विजेताले १५ लाख ११ हजार १११ रुपैयाँ प्राप्त गर्नेछ भने उपविजेताले ५ लाख पाउनेछ। प्रतियोगिताको सर्वोत्कृष्ट खेलाडीलाई १ लाख, उत्कृष्ट गोलकिपर, सर्वाधिक गोलकर्ता र उदीयमान खेलाडीलाई समान ५० हजार प्रदान गरिनेछ। साथै, हरेक खेलको विजेता टोलीले २५ हजार र प्लेयर अफ द म्याचले १५ हजार पाउनेछ।
प्रतियोगिताको दोस्रो दिन सोमबार दुई खेल हुनेछन्। पहिलो खेल बिहान ११:३० बजे नेपाल पुलिस क्लब र त्रिभुवन आर्मी क्लबबीच हुनेछ भने दोस्रो खेल दिउँसो ३ बजे आयोजक केपी ओली एफसी र न्यूरोड टिमबीच हुनेछ।
