काठमाडौं – प्रतिनिधि सभा सदस्य तथा पूर्वमन्त्री एकनाथ ढकालले मित्रराष्ट्र माल्दिभ्सका नवनिर्वाचित सभामुख अब्दुल रहीम अब्दुल्लासँग शिष्टाचार भेट गर्नुभएको छ।
बिहीबार माल्दिभ्सको संसद भवनमा सम्पन्न भेटवार्तामा द्विपक्षीय हितका विषय, संसदीय आदानप्रदान अभिवृद्धि, तथा क्षेत्रीय सहकार्यबारे छलफल भएको ढकालको सचिवालयले जनाएको छ।
सांसद ढकालले नेपालका सभामुख देवराज घिमिरेको तर्फबाट माल्दिभ्सका सभामुखलाई बधाई तथा शुभकामना दिनुहुँदै सार्क मुलुकहरूबीच संसदीय आदानप्रदानलाई अझ सक्रिय बनाउनुपर्ने धारणा व्यक्त गर्नुभयो।
सभामुख अब्दुल रहीम अब्दुल्लाले नेपाल र माल्दिभ्सबीच सौहार्दपूर्ण सम्बन्ध रहँदै आएको उल्लेख गर्दै आगामी दिनमा दुई देशबीचको सहकार्य थप मजबुत बनाउने प्रतिबद्धता जनाउनुभयो।
प्रतिनिधि सभाको अन्तर्राष्ट्रिय सम्बन्ध तथा पर्यटन समिति सदस्य रहेका सांसद ढकाल दुई दिने मैत्रीपूर्ण भ्रमणका क्रममा माल्दिभ्स जानुभएको हो। नेपाल र माल्दिभ्सबीच सन् १९८० मा औपचारिक कूटनीतिक सम्बन्ध स्थापना भएको थियो।
