काठमाडौं – वरिष्ठ पत्रकार भैरव रिसालको ९७ वर्षको उमेरमा निधन भएको छ। उहाँको शनिबार राति पौने ८ बजे बानेश्वरस्थित फ्रन्टलाइन अस्पतालमा उपचारको क्रममा निधन भएको हो।
रिसालले जीवित रहँदै आफ्नो शरीर मेडिकल अध्ययनका लागि दान गर्ने निर्णय गर्नुभएको थियो। सोहीअनुसार उहाँको पार्थिव शरीर पाटन स्वास्थ्य विज्ञान प्रतिष्ठानमा लगिँदैछ।
पञ्चायतकालदेखि सक्रिय पत्रकारिता यात्रा सुरु गर्नुभएका भैरव रिसालले लामो समय राष्ट्रिय समाचार समिति (रासस) मा कार्यरत रहँदै पत्रकारितामा गहिरो योगदान दिनुभयो। राससमा प्रमुख संवाददाता भएर अवकाश लिनुभएका रिसाल वातावरण पत्रकारिता र रेडियो सगरमाथा सँग पनि संलग्न हुनुहुन्थ्यो। रेडियो सगरमाथाको स्थापना कालदेखि नै संलग्न रहनुभएका रिसाल “रेडियो कुराकानी” र “उहिले बाजेका पालामा” कार्यक्रममार्फत आफ्नो विचार प्रस्तुत गर्नुहुन्थ्यो।
उहाँ जयतु संस्कृतम् आन्दोलनमा समेत सक्रिय रहनुभएको थियो। जीवनभर समाज, भाषा, संस्कार र पत्रकारिताको सेवामा समर्पित भैरव रिसालको निधनले नेपाली पत्रकारिता क्षेत्रमा अपूरणीय क्षति पुगेको छ।
