काठमाडौं – फास्टफुड एसोसिएसन नेपालले राज्य, बैंक तथा आइटी क्षेत्रसँगको सहकार्यलाई प्रोत्साहन गर्ने उद्देश्यले आयोजना गरेको ‘फास्टफ्यान कार्यक्रम’ सफलतापूर्वक सम्पन्न भएको छ।
काठमाडौंको कोटेश्वरस्थित होटल एभन भेन्युमा सम्पन्न उक्त कार्यक्रममा व्यवसायी, सरकारी निकायका प्रतिनिधि, बैंक तथा वित्तीय संस्थाका पदाधिकारी, पत्रकार, उद्यमी र सरोकारवाला व्यक्तिहरूको उल्लेखनीय उपस्थिति रहेको थियो।
कार्यक्रमको अध्यक्षता फास्टफुड एसोसिएसन नेपालका अध्यक्ष होमराज श्रेष्ठले गरेका थिए भने नेपाल सरकार गृह मन्त्रालय अन्तर्गत कसुरजन्य विभागका उपसचिव अमरदीप सुनुवार प्रमुख अतिथिका रूपमा उपस्थित थिए।
कार्यक्रममा प्रहरी नायब उपरीक्षक वीरेन्द्र गोदार, जिल्ला प्रशासन कार्यालय भक्तपुरका प्रशासकीय अधिकृत भोगेन्द्र श्रेष्ठ, कोटेश्वर प्रहरी इन्स्पेक्टर दलकुमार राई तथा गोर्खा ब्रुअरी प्रालिका सिनियर म्यानेजर रवीन्द्र सुवेदी लगायतका वक्ताहरूले फास्टफुड व्यवसायसँग सम्बन्धित विषयमा धारणा राखेका थिए।
कार्यक्रममा फास्टफुड व्यवसाय सञ्चालनका अवसर र चुनौतीहरूका विषयमा विस्तृत अन्तरक्रिया गरिएको थियो। यस किसिमका कार्यक्रमले सरकारी र निजी क्षेत्रबीच सहकार्यलाई सुदृढ बनाउने विश्वास आयोजकले व्यक्त गरेका छन्।
फास्टफुड एसोसिएसन नेपालका महासचिव राकेश श्रेष्ठका अनुसार, बैंक तथा आइटी क्षेत्रसँग सहकार्य गर्दै व्यवसाय सञ्चालनलाई सहज बनाउने लक्ष्यका साथ कार्यक्रम आयोजना गरिएको हो।
कार्यक्रममा नयाँ वर्ष २०८२ को शुभकामना आदानप्रदान, संस्थाको नयाँ क्यालेन्डर लोकार्पण तथा सरकारी निकायसँग प्रत्यक्ष अन्तरक्रिया समेत गरिएको थियो।
