महर्षि स्कुलका पाठकलाई अन्तर्राष्ट्रिय तेक्वान्दो च्याम्पियनशिपमा स्वर्ण पदक

काठमाडौं – महर्षि स्कुल, सामाखुशीका कक्षा ५ का विद्यार्थी सोहन पाठकले जापानको ओसाकामा सम्पन्न २१औं वाटा (WATA) अन्तर्राष्ट्रिय तेक्वान्दो च्याम्पियनशिपमा स्वर्ण पदक जितेका छन्।

टोलीका प्रशिक्षक सरोज तामाङका अनुसार, सोहनले पुरुष २४ केजी तौल समूहमा स्वर्ण जितेका हुन्। त्यस्तै, नेपालकै हृदयणी बस्नेतले महिला २९ केजी तौल समूहमा स्वर्ण पदक जितेकी छन्।

अप्रिल २५ देखि २७ तारिखसम्म भएको प्रतियोगितामा नेपाली खेलाडीहरूले थप १ रजत र २ कांस्य पदक जित्न सफल भएका छन्। महिला ३४ केजीमुनि जोलिना बस्नेतले रजत पदक जितिन् भने, एकल पुम्सेको पुरुष १४ वर्षमुनि आश्रय उपाध्याय र १२ वर्षमुनि सक्षम श्रेष्ठले कांस्य पदक प्राप्त गरे।

महर्षि स्कुलका प्राचार्य निर्मल पौडेलले खेलाडीहरूको समर्पण र अथक मेहनतको प्रशंसा गर्दै विद्यालयले अन्तर्राष्ट्रिय प्रतियोगितामा उपाधि जितेर अन्तर्राष्ट्रिय स्तरमा आफ्नो पहिचान बनाएकोमा खुशी व्यक्त गर्नुभयो।

यस प्रतियोगितामा १३औं दक्षिण एशियाली खेलकुद (साग) की स्वर्ण पदक विजेता काजल श्रेष्ठले निर्णायकको भूमिका निर्वाह गरेकी थिइन्। उनले अघिल्लो २०औं संस्करणमा पनि निर्णायकको भूमिका सम्हालेकी थिइन्।