काठमाडौँ — ऊर्जा, जलस्रोत तथा सिँचाइमन्त्री दीपक खड्कासँग विश्व बैंक दक्षिण एशियाका क्षेत्रीय निर्देशक पंकज गुप्ताले बिहीबार सिंहदरबारमा भेटवार्ता गरेका छन् । भेटमा १,०६३ मेगावाट क्षमताको माथिल्लो अरुण अर्धजलाशययुक्त जलविद्युत आयोजना प्रमुख विषयका रूपमा छलफल थियो।
विश्व बैंकका क्षेत्रीय निर्देशक गुप्ताले भारतीय पक्षले उठाएका केही प्राविधिक समस्या समाधान भएपछि आयोजना अघि बढाउन कुनै अवरोध नरहेको स्पष्ट पारे। मन्त्री खड्काले आयोजनाको वित्तीय व्यवस्थापन प्रक्रिया छिटो टुंग्याउन आग्रह गरे ।
भेटमा गुप्ताले भारतसँगको सहमति बिना अगाडि बढ्दा विवाद उत्पन्न हुन सक्ने भन्दै विश्व बैंक सहमतिमै प्रक्रिया अघि बढाउन चाहेको बताए । भारतीय पक्षले तल्लो तटीय क्षेत्रमा भारतीय कम्पनीद्वारा निर्माणाधीन आयोजनामा असर नपर्ने गरी माथिल्लो अरुणको ड्याम १०० मिटर माथि सार्नुपर्ने माग राखेको छ।
विश्व बैंकले एडीबी, जाईका लगायत साझेदारहरूलाई समेटेर करिब २ अर्ब अमेरिकी डलर बराबरको लगानी संरचना तयार गरिसकेको जनाएको छ। परियोजनाको पहुँच मार्गको निर्माण एडीबीको सहयोगमा सुरु हुन लागेको छ। नेपाल विद्युत प्राधिकरणले पनि करिब ६५ अर्ब रुपैयाँको स्वदेशी लगानी जुटाउनुपर्ने छ, तर त्यसबारे ठोस निर्णय भएको छैन।
अनुमानित लागत करिब २ खर्ब १४ अर्ब रुपैयाँ रहेको माथिल्लो अरुण आयोजनाको वित्तीय मोडालिटीमा ७० प्रतिशत ऋण र ३० प्रतिशत इक्विटी रहनेछ। अन्तिम ऋण सम्झौता प्राविधिक विवाद समाधानसँगै हुने सम्भावना रहेको छ।
भेटमा ऊर्जा मन्त्रालयका सचिव सुरेश आचार्य, सहसचिवद्वय चिरञ्जीवी चटौत र सागरराज गौतम, साथै विश्व बैंक नेपालका देशीय निर्देशक डेभिड सिस्लेन पनि सहभागी थिए।
