काठमाडौँ — नेपाली राष्ट्रिय पुरुष क्रिकेट टोलीले त्रिकोणात्मक टि२० अन्तर्राष्ट्रिय (T20I) सिरिजमा पहिलो जित दर्ता गरेको छ। मंगलबार डन्डीस्थित टिटवुड मैदानमा भएको तेस्रो खेलमा नेपालले घरेलु टोली स्कटल्याण्डलाई २ विकेटले पराजित गर्दै सिरिजमा पुनरागमन गरेको हो।
स्कटल्याण्डले दिएको ९८ रनको लक्ष्य नेपालले १९.५ ओभरमा ८ विकेट गुमाउँदै पूरा गर्यो। नेपाल, स्कटल्याण्ड र नेदरल्यान्ड्स तीनै टोलीको २–२ अंक भए पनि रन रेटका आधारमा नेपाल दोस्रो स्थानमा उक्लिएको छ।
ओपनर कुशल भुर्तेलले नेपालका लागि सर्वाधिक ३० रन बनाए। तर लक्ष्य सानो भए पनि नेपालका ब्याटरहरु निरन्तर आउट हुँदा खेल रोमाञ्चक बनेको थियो।
कुशलले ३५ बलमा ४ चौका प्रहार गर्दै योगदान दिए। कप्तान रोहित पौडेलले ७ रन जोडे। दीपेन्द्र सिंह ऐरीले १४ रन बनाउँदै नेपाललाई सम्हाल्ने प्रयास गरे।
तर १८औं ओभरसम्म आइपुग्दा नेपाल ९७ रनको लक्ष्य नजिक पुगिसकेको भए पनि अन्तिम क्षणमा लगातार विकेट गुमाउँदै दवावमा परेको थियो।
३ बल बाँकी हुँदा १ रन आवश्यक रहेको अवस्थामा किरण ठगुन्ना छक्का प्रहार गर्न खोज्दा क्याच आउट भए।
अन्ततः सन्दीप लामिछानेले पहिलो बलमै सिंगल लिएर नेपाललाई जित दिलाए।
यसअघि, टस जितेर ब्याटिङ गरेको स्कटल्याण्ड १९.४ ओभरमा ९७ रनमै अलआउट भएको थियो। सन्दीप लामिछानेले ४ ओभरमा १ मेडनसहित मात्र ११ रन खर्चेर १ विकेट लिए।
दीपेन्द्र सिंह ऐरी, करण केसी, र ललित राजवंशीले पनि राम्रो बलिङ गरे। माइकल लिस्कले स्कटल्याण्डका लागि सबैभन्दा राम्रो प्रदर्शन गर्दै ४४ रन बनाए। तर अन्य ब्याटरले खास योगदान दिन नसक्दा स्कटल्याण्ड सस्तोमा समेटियो।
