काठमाडौँ — गैरआवासीय नेपाली संघ (एनआरएनए) अष्ट्रेलियाको आगामी २०२५–२०२७ कार्यकालका लागि अध्यक्ष पदमा सञ्जीव ढकाल ‘गोर्खाली’ले आफ्नो उम्मेदवारी घोषणा गर्नुभएको छ।
ढकालले सामाजिक सञ्जालमार्फत औपचारिक रूपमा उम्मेदवारी घोषणा गर्दै आफ्नो अभियान केवल नेतृत्व प्राप्तिको लागि नभई स्पष्ट कार्यदिशा, जवाफदेहिता, पारदर्शिता र सहभागितामूलक समुदाय निर्माणका लागि केन्द्रित हुने उल्लेख गर्नुभएको छ।
उहाँले एनआरएनएको सदस्य संरचनामा व्यापक सुधारको खाका सार्वजनिक गर्दै स्वतन्त्र च्यारिटेबल संस्था रूपमा संस्थामा आबद्ध सम्पूर्ण विद्यार्थीहरूलाई पुनः सहायक सदस्यका रूपमा समावेश गर्ने योजना प्रस्तुत गर्नुभएको छ। साथै, नेपालसँग नाता राख्ने वा नेपाली मूल भएका सबै व्यक्तिलाई एनआरएनएको सदस्यता दिन कानुनीरूपमा व्यवस्था मिलाइने उहाँको भनाइ छ।
“हामी वाचा मात्रै गर्दैनौं, काम गरेर देखाउँछौं,” ढकालले सामाजिक सञ्जालमा लेख्नुभएको छ, “छिट्टै विस्तृत एजेन्डा र सेवा कार्ययोजनासहित पुनः उपस्थित हुनेछु।”
हाल ढकाल एनआरएनए अष्ट्रेलियाको उपाध्यक्ष हुनुहुन्छ भने नर्दन टेरिटोरी राज्यका संयोजकको रूपमा समेत सक्रिय रहनुभएको छ।
एनआरएनए अष्ट्रेलियाको निर्वाचन सन् २०२५ जुलाई २६ तारिखका दिन हुने कार्यक्रम तय भएको छ।
