म्याड्रिड, स्पेन । प्रधानमन्त्री केपी शर्मा ओलीले नेपाललाई दक्षिण एशियामै लगानीका लागि सबैभन्दा अनुकूल वातावरण भएको देशमध्ये एक भएको बताएका छन् ।
स्पेनको म्याड्रिड स्थीत नेपाली दूतावासद्धारा आयोजित स्पेनी र नेपाली व्यावसायिक समुदायसँगको अन्तरक्रिया कार्यक्रममा प्रधानमन्त्री ओलीले स्पेनी व्यवसायीहरूलाई नेपालमा लगानी गर्न आह्वान गरेका हुन् ।
उनले राजनीतिक स्थायित्व, खुला बजार नीतिहरू, प्रतिस्पर्धी श्रमशक्ति र लगानी सुरक्षाका विधेयकहरूले नेपाललाई अन्तर्राष्ट्रिय लगानीकर्ताहरूका लागि आकर्षक गन्तव्य बनाएको उल्लेख गरे।
नेपालले समावेशी आर्थिक रूपान्तरणलाई प्राथमिकता दिएको र निजी क्षेत्रलाई आर्थिक वृद्धिको प्रमुख इञ्जिनका रूपमा स्वीकार गरेको प्रधानमन्त्री ओलीको भनाई थियो ।
उनले कानुनी, संस्थागत र प्रक्रियागत सुधारहरूलाई थप प्रभावकारी बनाउँदै लगानी मैत्री वातावरण निर्माण गर्न सरकार प्रतिबद्ध रहेको स्पष्ट पारे ।
“नेपालमा स्थायित्व, सम्भावना र सुधारको स्पष्ट मार्ग छ,” प्रधानमन्त्री ओलीले भने, “नवीकरणीय ऊर्जा, कृषि, सूचना प्रविधि, पर्यटन, स्वास्थ्य र शिक्षा क्षेत्रमा अपार अवसर छन्।”
कार्यक्रममा स्पेनका लागि नेपालका राजदूत सनिल नेपालले प्रधानमन्त्री सहितको नेपाली प्रतिनिधि मण्डललाई स्वागत गर्दै यो भ्रमणले नेपाल र स्पेनबीचका धेरै ढोका खोलेको उल्लेख गरे ।
उनले दुई देशबीच लगानी, व्यापार, शिक्षा, सिप, रोजगारी, पर्यटन, कला, संस्कृति लगायतका क्षेत्रमा सहकार्यका लागि आफुले धेरै प्रयत्नहरु गरिरहेको पनि जानकारी दिएका थिए ।
कार्यक्रममा नेपालका परराष्ट्र सचिव अमृतबहादुर राई, उद्योग बाणिज्य महासंघका अध्यक्ष चन्द्र ढकाल लगायतले पनि दुई देशबीचमा सहकार्यका संभावनाहरुका बारेमा चर्चा गरेका थिए ।
चौथो अन्तर्राष्ट्रिय वित्तीय सहयोग सम्मेलनमा सहभागीताका लागि स्पेन आएका प्रधानमन्त्री ओली सम्मेलनबाट फर्किएपछि दूतावासले विषेश कार्यक्रम आयोजना गरेको हो ।
गत शनिबार नेपालबाट स्पेन प्रस्थान गरेको ओली नेतृत्वको नेपाली प्रतिनिधि मण्डल आज स्पेनबाट स्वदेश फर्किने कार्यक्रम छ ।
