काठमाडौँ – संघीय सांसद एकनाथ ढकालले बाँकी रहेका ११ राष्ट्रसँग समेत कूटनीतिक सम्बन्ध स्थापना गरी संयुक्त राष्ट्रसंघका सम्पूर्ण १९३ सदस्य राष्ट्रहरूसँग नेपालको सम्बन्ध जोड्न सरकारको ध्यानाकर्षण गराएका छन्।
आज बसेको प्रतिनिधिसभाको बैठकमा बोल्दै सांसद ढकालले नेपालले सन् १८१६ मा संयुक्त अधिराज्य (बेलायत)सँग पहिलो कूटनीतिक सम्बन्ध स्थापना गरेको उल्लेख गर्दै अहिलेसम्म १८२ राष्ट्रहरूसँग नेपालले कूटनीतिक सम्बन्ध स्थापित गरिसकेको जानकारी गराए।
उनले भने, “गत वर्ष अधिराज्य टोंगासँग कूटनीतिक सम्बन्ध स्थापनासँगै यो संख्या पुगेको हो। बाँकी ११ राष्ट्रहरूसँग पनि यथाशीघ्र सम्बन्ध स्थापना गरिनु जरुरी छ।”
सांसद ढकालले परराष्ट्र मन्त्रालयको गम्भीर ध्यानाकर्षण गराउँदै बाँकी राष्ट्रहरूसँग पनि कूटनीतिक सम्बन्ध विस्तारका लागि पहल गर्न आग्रह गरे।
यस्तै, सांसद ढकालले नेपालका ३० वटा कूटनीतिक नियोग र ४९ जना मानार्थ वाणिज्य दूतहरूको कार्यक्षमताबारे पनि प्रश्न उठाएका छन्। उनले सोधे, “नेपाल र त्यहाँ रहेका नेपालीहरूको हितमा यी वाणिज्य दूतहरूले के–कस्ता काम गरेका छन् ? कति सक्रिय छन् र कति निष्क्रिय ?”
उनले कार्यशैली असन्तोषजनक देखिएका तथा निष्क्रिय मानार्थ वाणिज्य दूतहरूलाई पुनरावलोकन गर्नुपर्नेमा जोड दिए। साथै, नेपालको हित र आर्थिक कूटनीति प्रवर्द्धनमा सक्रिय भूमिका खेल्न सक्ने योग्य व्यक्तिहरूमध्येबाट मानार्थ वाणिज्य दूतहरू नियुक्त गर्नुपर्नेमा उनको माग छ।
ढकालले सभामुखमार्फत परराष्ट्र मन्त्रालय र नेपाल सरकारको ध्यानाकर्षण गराउँदै आवश्यक पहलको आग्रह गरे।
