काठमाडौं – नेपाल पर्यटन बोर्डद्वारा आयोजना गरिएको मासिक अनलाइन फोटोग्राफी प्रतियोगिता ‘फोटोनेपाल’ को मे–जुन संस्करणका विजेताहरू घोषणा गरिएको छ। प्रतियोगितामा २४१ वटा तस्बिर प्राप्त भएका थिए, जसमा नेपालको प्राकृतिक सौन्दर्य, सांस्कृतिक विविधता र जनजीवनको कलात्मक चित्रण गरिएको थियो।
उत्कृष्ट ठहरिएका तीन तस्बिरमध्ये राष्ट्रिय फोटो पत्रकार समूह, नेपाल (एनएफपिजे) का केन्द्रीय सदस्य तथा फोटो पत्रकार सुशील श्रेष्ठको ‘साँझदेखि बिहानसम्म’ शीर्षकको तस्बिरले उत्कृष्टता हासिल गरेको छ। साथमा बबी शाहको ‘लाखे’ र प्रियाशुं कर्णको ‘जनकपुरधाम’ तस्बिर पनि विजेतामा पर्न सफल भएका छन्।
प्रतियोगिताको मूल्याङ्कन वरिष्ठ फोटोग्राफर मीन रत्न बज्राचार्य र नेपाल पर्यटन बोर्डका निमित्त निर्देशक सुनील शर्माले गर्नुभएको थियो।
नेपाल पर्यटन बोर्डका प्रमुख कार्यकारी अधिकृत श्री दीपक राज जोशीले फोटोनेपाल कार्यक्रम फोटोग्राफीलाई सिर्जनात्मक विधासँग जोड्दै नेपालको भावना र पहिचानलाई विश्वभर प्रवाह गर्ने माध्यम भएको उल्लेख गर्नुभयो।
विजेताले जनही रु. २५,००० नगद पुरस्कार प्राप्त गर्नेछन्। नेपाल पर्यटन बोर्डले प्रतियोगितामा सहभागिता जनाएका सम्पूर्ण फोटोग्राफरहरूलाई आभार प्रकट गर्दै यस्ता कार्यक्रमहरूले नेपाललाई सुन्दर, विविध र पर्यटकमैत्री गन्तव्यका रूपमा प्रचार गर्ने विश्वास व्यक्त गरेको छ।
विजेता र अन्य उत्कृष्ट तस्बिरहरू photo.ntb.gov.np मा हेर्न सकिन्छ। बोर्डले आगामी संस्करणहरूमा पनि सहभागी हुन सबैलाई आग्रह गरेको छ।
