काठमाडौं — दोस्रो संस्करणको एभरेष्ट महिला भलिबल लिग (EWVL) का लागि सहभागी टोली मधेश युनाइटेड ले चर्चित मोडल तथा अभिनेत्री नीति शाहलाई आफ्नो ब्रान्ड एम्बासडर मा नियुक्त गरेको छ।
मिस नेपाल इन्टरनेशनल २०१७ की विजेता नीति शाहले क्लबसँग जोडिन पाउँदा आफू अत्यन्त खुशी र गर्वित भएको प्रतिक्रिया दिएकी छन्। भलिबलको प्रवर्द्धन र महिला खेलाडीहरूको हौसला वृद्धिमा आफूले सकारात्मक भूमिका खेल्ने आशा उनले व्यक्त गरेकी छन्।
यसका साथै क्लबले राष्ट्रिय महिला भलिबल टोलीकी प्रमुख स्पाइकर निरुता ठगुन्नालाई पुनः मार्की खेलाडीको रूपमा निरन्तरता दिएको छ।
कोपिला उप्रेतीलाई भने टोलीको प्रशिक्षकका रूपमा नियुक्त गरिएको छ।
ईन्फिनिटी ड्रिम्सको आयोजनामा हुन लागेको दोस्रो एभरेष्ट महिला भलिबल लिग भदौ २० देखि २८ गतेसम्म सञ्चालन हुने तयारी भइरहेको आयोजकले जनाएको छ।
